هلا بك يالرموش اللي كساها من الغرور غرور
هلا بك يالعيون اللي كستها رموش مغروره
هلا بالبسمه الحلوه هلا باللؤلؤ المنثور
هلا باللي تغار الشمس من ضيّه ومن نوره
على ساحل عيونك بحر غامض من وراه بْحور
غرق به قلبي الحاير ومجدافه وبابوره
أحبك كثر ما غنّى الحمام وغرّد العصفور
كثر ما حاول الإنسان يكشف سرّ عصفوره
أحبك كثر ما هلّت دموع العاشق المقهور
كثر ما حاول العاشق يوصّف خافي شْعوره
أحبك حب مؤمن يعشق ويهوى بنات الحور
وهو معذور في حبه وروحي فيك معذوره
حبيبي بيني وبينك غرام الورد والبلور
جمعهم حب واحد وأصبحوا عشّاق مسحوره
حبيبي حبنا ماهو قصيده تعجب الجمهور
حبيبي حبنا قصه تعيش سْنين مشهوره
حبيبي لو قعدت أرسمك في شِعري ثمان شْهور
قضت كل الشهور ولا قدرت أكمّّل الصوره