الي اللي بالي ........؟؟؟؟؟؟
الله اني بت احبك من كلامك والبيان
والله اني بت عاشق للمعاني والهدف
من قرا لك طب قلبه بالعواطف في ثوان
ثمّ ردّد ( حسبي الله حسبي الله ) وانصرف
ذوّبتني هالمشاعر والعذوبة والمعان
واستحلت قلب شاعر بالمحبة وانجرف
كل كلمة من كلامك لولوة والكل دان
لا قريتك فزّ قلبي من مكانه وارتجف
هي مشاعر خالجتني وقتها والوقت حان
اعترف لك بالمحبة واعترف لك بالشغف
قلتها لك والله يعلم وش صراحة هاللسان
لو يخادع بالمشاعر او بقوله ما حلف
ذا شعوري والمقاصد بيّنة والعلم بان
من بداية ما عرفتك حتى يومك ما اختلف
ودّي انشد يا الاميرة عن لجوئي والامان
تمّ شعرك في عذوبة وتمّ حسّك في رهف
الاماني راودتني اعترف لك من زمان
مير همي من كلامك ( يا هلا بك يا الترف )
لا تقولي كلمتينك او تقولي يا جبان
واتركيني في عتابي .. ليت قلبي ما اعترف
حسّسيني باهتمامك وارحميني من هوان
وارسميني في خيالك واسلكي درب الكلف
اسمحيني لو بديت بموقفي من هالمكان
واسمحيني لو جرحتك والاسف يتبع اسف