[أثير الشوق]

(سبب تافه والنتيجه .......طلاق!! ....اقرأ القصص وحاورني ...)




الزوجه : ابيك توديني السوق
الزوج وهو يعمل على جهاز الحاسوب طيب طيب باجر او اللي بعده
الزوجه: لا......... الحين
الزوج :قلت باجر يلا عاد....خليني بخلص شغلي
الزوجه معصبه :اقولك قوم ودني ....الحين ....الحين
الزوج يصرخ طلعي من المكتب وصكي الباب ...مافي سوق....يلا برا
الزوجه في قمة غضبها تغلق شاشة الحاسب بقوة ....
وتخرج وهي تهدد ...انا أوريك ..
بعد لحظات ...يخرج الزوج ويجد الاولاد والخادمه ...
ولا يجد الزوجه ...
عرف الزوج ان زوجته طلبت سيارة للاجرة
وذهبت الى منزل ذويها ..وشعر بالضجر من تصرف زوجته وخروجها من المنزل بدون علمه و بسيارة اجرة
ولكنه تمالك اعصابه ....
أخذ الاولاد والخادمه وأوصلهم الى أمهم ...
وبكل هدوء يرجع الى منزله ...

الزوجه وهي في الطريق الي أهلها ...تتصل باحدى أخواتها ...وتخبرها بالامر وهي تبكي ...وتقول : طقني
و طلعت من البيت خفت يذبحني .......
أخت الزوجه كانت في زياره لمنزل عمتها وبعد المكالمه تنهض على عجله
تسالها عمتها : تو الناس قعدي شوي
لا لا ....بروح أختي طاقها زوجها وبغى يذبحها زين انها انحاشت عنه بالتكسي ...رايحه لأهلي ....
عمتها : لا حول ولا قوة الا بالله وعيالها وينهم ..
مادري بس شكلها المسكينه معذبها ....

الزوجه عند أهلها ..وبعد لحظات يدخل عليها أطفالها والخادمه ....
وتبكي عند والدتها وتشتكي ...مايوديني ...في الوقت اللي أبي ....انا ماأتحمل طريقته ...
الام : اذا موفاضي يوديج ...ولا يجيب سايق
ليش مايخليج تسوقين؟؟
البنت : مادري عنه ........
أمس يوم رحنا نتعشي بالمارينا قلتله ابي أطلع استمارة سياقه بس مارد على...
...وقبل كم يوم لما كنا بسوق شرق وشفت سيارة فااان بالمصافط
قلتله شرايك نشتري وحده ونجيب سايق...هم مارد علي ...
لا وذاك اليوم لما رحنا الالعاب نلعب عيالي...
كل شوي تلفونه يرن ..
قلتله لو انك معطيني سياره كان خليتك تروح لاشغالك ...
بس شنو ....رد على يقول :...انا مشتكيت...
وانا ماتعبت ....أوديكم وأجيبكم ...
أخت الزوجه الصغرى : كل هذا وتقولين مايودي ولا يجيب ....
والله حاله انتي شنو اللي يترس عينج ؟؟؟
البنت (الزوجه ): انتي موشغلج ....لاتدخلين
الام : خلاص ....خلاص ....خليه باجر بيجي وياخذج ويراضيج .....
ماعليج مارده لج ....

بعد ايام ....
الزوجه من زواره لبيت وبيت مع الام وحضور حفلات واعراس ...
ولو احد من اقاربها سألها عن حالها ... حطت عذاريب الدنيا بزوجها ...ومافيه خير بالمره ...
طبعا الكل عرف بالسالفه ...واستغربوا ....اما الزوج ماحرك ساكن....
ولا فكر يدق عليها.... ولا تكلم بالموضوع عند أحد ...
حتى أمه ماحبت تدخل... بس لاحظت ان ولدها يحظر ويتغدى ويتعشى معاهم وما شافت عياله معاه ....
حتى ماذكر شي ....ويقعد الى ساعه متأخرة يسهر مع أخوانه ....وبعد منتصف الليل يطلع لبيته ....

تقابل أخت الزوج الزوجه في منزل أهل الزوجه ....
وتحاول الزوجه بطريقه غير مباشره انها تجعل أخته تحاول ان تطلب من الزوج انه يراضي زوجته ...ويتصل فيها ( كأن الغلط منه )
أخت الزوج لاتبالي
وقالت : بصراحه أنا ماأحب أتدخل بين أي رجل وزوجته حتى لو كان أخوي ...
وعلشان أكون صريحه معاج وبعد ماصارلك أكثر من اسبوع وأنتي هاده بيتك وزوجك .....
ترى أخوي طلب مني اني أدور له على بنت للزواج....
وماقال أي شي غير كلمتين (أنا طابت نفسي منها )......
الأفظل انك ترجعين لبيتك ...
وترى أخوي ممكن انه يسامح اذا انتي اعترفتي بغلطك ...
وخليكي واقعيه ...ولاتمشين على كلام الحريم ....
ترى اللي مأيدينك حاسدينك....وزوجك العين عليه ....
...الزوجه انصدمت ...وصارت تدق وتدق وتدق ........
بس الزوج مايرد .....لانه ماخذ بخاطره ...
وفعلا ماخذ بخاطره ومفكر يطلق و يتزوج من ثانيه ويقول بلاوجع بلا عوار قلب ....

الزوجه صارلها اكثر من يوم عايشه في رعب وخايفه ...
ومو متخيله زوجها يتركها ويفكر بثانيه ...
ومالها خلق احد .....وتنطر وتحلم انه يجي ويراضيها ........(ياحرام مصدقه نفسها )......
والزوج ماعبرها ولا كلمها من خلت بيتها.....
في هاللحظه...
تصل رساله للزوجه على هاتفها من احدى القريبات
: نص الرساله ( صج ان زوجك طلقك ويدور له على مره )
الزوجه ماعاد ت تحيط وصارت تبجي وتصيح يما لحقي علي تكفين يايمه .....
بس من غير شعور راحت بسرعه ولمت اغراضها
وظفت عيالها وسحبت خدامتها ....
وركضت لبيتها ....بس مو مع التاكسي لا .....
بكل احترام طلبت من اخوها يوصلها ...
رجع الزوج لبيته مرهق وتعبان واندهش من اللي شافه .....
ولايدري شنو اللي خلاها ترجع من كيفها مع انه لا طلق ولا يحزنون ......
مجرد كلام ....بس الناس ماصدقوا لقوا سالفه وزادوها بهارات .....
وبكل هدوء سلم على اولاده وراح لغرفة المكتب
وجلس على مكتبه
وفتح جهاز الحاسوب وعاد لشغله ....
وعادة الحياة لمجاريها .....


بعد هذي القصه الحقيقيه القصيره والتي صغتها باسلوبي لكم ونقلتها من ارض الواقع ....
هنا اطرح موضوع بين ايديكم صغير في نقلي كبير في مساوءه على مجتمعنا .....
موضوع الطلاق لأسباب تافهه ....
أو مشاكل زوجيه تافهه وفارغه قد تطرق أبواب الطلاق والتفكك الاسري وتشتت الاولاد بين أب وأم منفصلين .....
هل هذا سبب مقنع لمشكله مقنعه ....
اعتقد اننا نستطيع ان نمنع بعض اسباب الطلاق ....
وللأسف عندما تكون الأسباب تافهه وبعضها مخجله ومضحكة .....

مقتطفات على الهامش............
الزوجه : اريد جهاز هاتف جديد
الزوج : ماعندي فلوس
الزوجه : توك شاري جهاز جديد
الزوج: جهازي قديم وخربان فيها شي .....وكيفي اشتري متى مابغيت....
الزوجه : وانا مااستاهل ولا شنو
الزوج بعصبيه : لا ماتستاهلين....... فكينا زين
الزوجه : ليش تصارخ ....انا مو تارسه عينك
الزوج : بلا تارستها وباطتها وباطه جبدي من طلباتج
الزوجه وهي تبكي : انا باطه جبدك انا غلطانه اللي قاعده عندك
الزوج : روحي باللي مايحفظج .................................................. ............طلاق ..........

صوره اخرى ..........
الزوجه تحدث زوجها : أنا أحس بضيق وماشاء الله عيالك كبروا وبنتك بالثانويه ....نبي نتوسع
عيالي الخمسه بغرفه ...وغرفت عيال عمهم يمهم ....شرايك تبني فوق بيت اهلك او ندور بيت أجار ....
الزوج :بلعي العافيه وماراح أطلع من بيت أبوي واذا بتوسعين روحي لهلك
الزوجه : شنو طرده ....أفهم من كلامك ان.......
الزوجه : أي .... طرده ...مو عاجبج..... الباب يوسع جمل ........................................طلاق...... .....


وزوجه تجلس ثلاث شهور زعلانه تبي طقم جلوس وأثاث جديد ...وأخرى تبي تسافر مثل رفيقاتها ....وأخرى زعلانه لان زوجها سافر بالقرض اللي خذته على معاشها علشان يسدد المبالغ اللي عليه ووعدها يوديها بالباقي لأووربا بس الأخ طنشها و أكل الفلوس وسافر وخلاها مقهوره وعزمت ماترجع له وطلبت الطلاق ........



ضوء ساطع على الموضوع ..........
هل المشكله في جهل التعامل الجيد بين الازواج في هذا الزمن
أم هو النقص في الاسلوب الجميل والتفاهم اثناء الحوار ....
أم نقص الماده .....أم الانانيه .....أم كله زي
بعضه ..........والنتيجه في كل الحالات وحده.............................
تحياتي لكم :اختكم أثير الشوق

الموضوع الأصلي: سبب تافه والنتيجه .......طلاق!! ....اقرأ القصص وحاورني ... | | الكاتب: أثير الشوق | | المصدر: شبكة بني عبس