لك الله أن نسيانك فلا يطري على بالي
تطمن لو يطول الوقت مثلك صعب نسيانه
تراك الأول لحالك .. تراك لحالك التالي
أنا وشلون أبنسى وانت معك الروح ولهانه
عنك لو طول غيابي عنك قلبي ماهو سالي
غلاك المعّلم البارز بقلبي شب ضيانه
حبيبي يابعد عمري وياهمي وغربالي
أنا بنشدك كيف القلب لولا نبض شريانه
وأبا منك الأجابه بختصار وشوق يالغالي
دخيلك لاتعديها عروق الدم عطشانه
ونصيحه لاتسمع هرجة أهل القيل والقالي
هل النمات كم شالو ثمر ناضج أبستانه
أنا طرقي معك مبطي وعنك صعب مرحالي
وانا ضيفٍ ضواه الليل جاك بنفس شفقانه
تراي أنسان عادي بس أحبك حبٍ أهبالي
ولو نار الغرام أتشاف كانك شفت نيرانه
وانا لو قلتلك بنساك فال الله ولافالي
غلاك اللي ملكني دون هجرك صك بيبانه
ترى حب الوفاء ماهي محبة وقتنى لحالي
أبا منك وتبي مني ولاينشاف برهانه
ومحبتنا على عز وشرف ياعدم الامثالي
وعلى هذا تخاف أنساك هذي مالها خانه
تطمن دام راسي حي حبك صعب ينزالي
وكانه غاب راسي عنك عذري منك جثمانه
خشمان الرشيدي