15-09-2009, 02:59 AM
|
|
اما بعد
شح الكلام وصملن الطواريق
والشعر لو وقفت واصل طريقه
فأن كان من عقب السعه حدك الضيق
منصاك من عقب الخيال الحقيقه
كم لك تلفق من خيالك تلافيق
بأوهام جاوزت الخليج ومضيقه
تمدح ردي وتركبه قمة طويق
وتكتب غزل عاشق ولالك عشيقه
وتسافر لجمهور عطشان تصفيق
وتنافس المتعلثه والعويقه
تجري ورى الاعلام وتخب وتويق
ومع كل تافه لك علاقه وثيقه
لانك تحسب الشهره تجوز وتليق
وانها على كل الاوادم شفيقه
ماتدري انها تشب وتغط وتفيق
واحيان تقطع بالرفيق ورفيقه
رح علم اللي شهرته بالتوافيق
بكره اذا طال المدى نشف ريقه
ثلاثه الشعار خل الملاحيق
ماعاد للرابع معاهم طريقه
شاعر وينحت فالصخر نحت ذوييق
وشاعر يغرف من البحور العميقه
وشاعر اذا مر الحدايق مغاليق
قامت تفتح له حديقه حديقه
لفكار فيهن البكار الغرانيق
النايفه والذايره والرشيقه
اللي ماهن يراوزن التفافيق
واللي تسلف بندقه من صديقه
واما بعد ياهل العزوم الشواهيق
ياللي عليكم كل نجم وبريقه
الى متى وحنا العيون الغواريق
والى متى وحنا القلوب الرقيقه
والى متى وحنا الرقاب المدانيق
والى متى وحنا هدف كل ضيقه
واما بعد ياهل الوفى يالمطاليق
ياهل البيوت الشامخات العريقه
حنا بزمن غفله وجفوه وتفريق
واخلاق منحله وعالم طليقه
تمسكوا بالعروتين المواثيق
المصحف وسنة نبي الخليقه
واما بعد يا قافلين الصناديق
لعل روس اموالكم للحريقه
فقرانكم ما حصلوا بلة الريق
وانتوا تعدون الذهب بالدقيقه
والا تبثونه على غير توفيق
في مزاينات وجاهليه عتيقه
واما بعد الاحلام تحتاج تحقيق
والحلم حملناه مالا يطيقه
شرع الله ان حصل على الارض تطبيق
وشفت المساجد بالعرب مستظيقه
فأبشر بنصر بأمر رب المخاليق
وابشر بريحان النعيم ورحيقه
واما بعد ياحسين صلح لي بريق
في خايعن طشت عشوبه وريقه
الذود فالصمان والنفط فبقيق
والله يخلي مملكتنا الشقيقه
عبدالله بن علوش
|