قصيدة متواضعة إلى مقام والدي الشيخ/فايز بن حامد البغيلي رئيس منظمة عبس العالمية...
يظهرن الفعول ويختفن الحكاوي=ومن تردى نصيبه ما يفيد إحتجاجه
واحد ما يحوش الطيب والعود راوي=كيف لامن يبس عوده يعدل إعوجاجه
ماتطال الفعول الطايلة بالمناوي=والرجل قبل مدخاله يميز خراجه
يعقدن العقود ويرجعن الدعاوي=لراعي الفعل والناموس يوم المواجه
حر ليا سطى في سطوته ما يراوي=وإن شهر عن مدى الشويف يبعد مراجه
مثل فايز ولد حامد سليل النداوي=شيخٍ يشوش طيب ولا يتعكر مزاجه
سيلٍ ليا حدر بطن الشعيب السناوي=يروي الأرض من عقب المحل والعجاجة
ما يعاديك يا ذيب الفلأ غير شاوي=وأنت ماتهاب صيحة شاويٍ مع نعاجه
جيت لك يا ولد حامد ولاني بغاوي=دام ملفاي للضيف يتفلل حجاجه
وظامي بين رس و بين عد رهاوي؟=وش يبي بالرسوس أم الظمأ والهماجة؟!
جيت لك من علاوي نجد أحث الخطاوي=ولا نصيتك وأنا لي بالمذاخير حاجة
في جرحٍ حشمته عن يدين المداوي=وجيت لك حشمةٍ له عل عندك علاجه
جيت لك والهقاوي يدحمن الهقاوي=وكلمة العقل تحشم واللجاجة سماجة.