[(ابوعواض)]

بديت باسم الله والذكر منساه 00 يالله ياربي عليك اعتمادي


الواحد المعبود ماشي يخفاه 00محيي العضام الباليات الرمادي


جلا جلاله مالنا غير رجواه 00 سبحانه العالم بيــوم الحصــادي


ومن بعد ذكر الله شديت معناه 00 وابديت من زين المثايل مرادي


يابو شلش بيتك علي العز زرناه 00 والبيت من غيرك حشي مايرادي


بيت الشرف والجود ياحلو مبناه 00 يذري ذراه وضو ناره ينادي


عسآه دايم فيك ويدوم من جاه 00 في جاه رب البيت محصي العبادي


اعجبت بالتوراث بالبيت شفناه 00 تراث اهلنا بالســنين البعـــادي


وشفت الدلال اللي علي الكيف محلاه 00 بيض وصفر والكل منها جدادي


للضيف والجيران دايم معــباه 00 من البن موزونن عليها القنــادي


غايب الليامن المسير تنصاه 00 يلقي الحفاوه والكرم شــي عـــادي


من ربعتن يوم الملاقي ماتشناه 00 عوامره وان حل وقت الطرادي


ياويل من بالمعركه صاروا ملقاه 00 عليها دورات اللـيالي وكــادي


الكل منهم تفعل الطيب يمناه 00 مداتـــهم بالضــيق تمــلي الايــادي


من لابتي واعتز به لاعدمناه 00 بنــي رشــيــد مـشتـتـين الاعـادي


من عبس منسبنا وغطفان تقفاه 00 وغطان من نزار مرجع جدادي


من معد بن عدنان كفه وسمناه 00 علي القلوب اللي سعت بالفسادي


والطيب وهبه وهل العرف مقضاه 00 والناس مثل الناس حظر وبوادي


ومن عمل شي بسآعه الحشر يلقاه 00 للنار او الجنه حديــهن يقادي


ومدحي لبو شلش يشرف ولاانفاه 00 والمدح من غير الفعايل نفــادي


شوفي بعيني ماهو قولا نقلناه 00 وعبرت عن ماشفت حسب اعتقادي


وصلاة ربي عد غيثن نثر ماه 00 عـلـي النـبي عـداد جمـع الجـرادي








عواض بن مديهيش القلادي ( والدي )

الموضوع الأصلي: بديت باسم الله والذكر منساه | | الكاتب: (ابوعواض) | | المصدر: شبكة بني عبس