وهذي لشاعر بديوي الوقداني العتيبي:
أيامنـا والليـالـي كــم نعاتبـهـا / شبنا وشابت وعفنا بعـض الأحوالـي
تاعـد مواعيـد والجاهـل مكذبهـا / واللي عرف حدها مـن همهـا سالـي
إن أقبلت يوم ما تصفـى مشاربهـا / تقفي وتقبل وما دامـت علـى حالـي
فـي كـل يـوم تورينـا عجايبهـا / واليوم الأول تراه احسن مـن التالـي
أيـام فـي غلبهـا وايـام نغلبـهـا / وايـام فيهـا سـوا والدهـر ميالـي
جربت الأيـام مثلـي مـن يجربهـا / تجريب عاقـل وذاق المـر والحالـي
نضحك مع الناس والدنيـا نلاعبهـا / نمشي مع الفي طوع حيث مـا مالـى
كم من علـومٍ وكـم آداب نكسبهـا / والشعـر مـازون مثقـالٍ بمثقـالـى
اعرف حروف الهجاء بالرمز واكتبها / عاقل ومجنون حاوى كـل الاشكالـى
لكن حظـي ردي والـروح متعبهـا / ما فادني حسـن تاديبـي مـع أمثالـي
إن جيت ابي حاجةٍ عـزت مطالبهـا / العفو ما واحدٍ في النـاس يـا والـى
قومٍ الـى جيتهـم رفـت شواربهـا / بالضحك واقلوبها فيهـا الـردا كالـى
وقومٍ الى جيتها صكـت حواجبهـا / وابد ت لي البغض في مقفاي واقبالـي
ما كني إلا بحال و حـال مغضبهـا / والكل فـي عشرتـه ماكـر ودجالـي
يا حيف تخفي أموراً كنـت حاسبهـا / واللي على بالهـم كلـه علـى بالـي
الجار جافي وكـم قـومٍ محاربهـا / والأهل وأصحابنـا والـدون والعالـي
والروح ويش عذرها في ترك واجبها / راح الحسب والنسب في جمع الأموالي
نفسي تبى العز والحاجات تغصبهـا / ترمـي بهـا بيـن أجاويـد وانذالـي
المال يحـي رجـالاً لا حيـاة ابهـا / كالسيل يحي الهشيـم الدمـدم البالـي
عفت المنازل وروحي يـوم اجنبهـا / منها غنيمـه وعنهـا البعـد أولا لـي
لا خير في ديرةٍ يشقى العزيز ابهـا / يمشي مع النـاس فـي هـمٍ وإذلالـي
دارٍ بهـا الخـوف دومٍ مـا يغايبهـا / والجوع فيها ومعها بعـض الاحوالـي
جوعى سراحينهـا شبعـى ثعالبهـا / الكلـب والهـر يقـدم كـل ريبالـي
عز الفتى راس ماله مـن مكاسبهـا / يا مرتضي الهون لا عـزٍّ ولا مالـي
دللت بالروح لين ارخصـت جانبهـا / وانا عتيبـي عريـب الجـد والخالـي
قومٍ تدوس الافاعـي مـع عقاربهـا/ ولهـا عزايـم تهـد الشامـخ العالـي
خل المنـازل وقـل للبيـن يندبهـا / يبكـي عليهـا بدمـع العيـن هطالـي
لا تعمر الـدار والقـالات تخربهـا / بيع الردي بالخسـاره واشتـر الغالـي
ما ضاقت الأرض وانسدت مذاهبهـا/ فيهـا السعـه والمراجـل والتفتالـي
دارٍ بــدار وجـيـرانٍ نقاربـهـا/ وارضٍ بـأرض وأطـلالٍ بأطـلالـي
والناس اجانيب لين إنـك تصاحبهـا/ تكـون منهـم كمـا قالـوا بالأمثالـي
الارض لله نمشـي فـي مناكبـهـا/ والله قــدر لـنـا أرزاق وآجـالـي
حـث المطايـا وشرِّقهـا وغرِّبهـا / واقطع بهـا كـل فـجٍّ دارسٍ خالـي
واطعن انحور الفيافي فـي ترايبهـا / وابعد عن الهم تمسـي خالـي البالـي
مـن كـل عمليـةٍ تقطـع براكبهـا / فدافـد البـيـد درهــامٍ وزرفـالـي
تبعدك عـن دار قـومٍ ودار تقربهـا/ واختـر لنفسـك للمنـزال منـزالـي
لو متّ فـي ديـرةٍ قفـراً جوانبهـا / فيها لوطى السبـاع الغبـس مدهالـي
اخير مـن ديـرةٍ يجفـاك صاحبهـا / كـم ذا الجفـا والتجافـي والتعلالـي
دوس المخاطر ولا تخشى عواقبهـا/ الموت واحـد وبعـد العـز يجلالـي
ان المنايـا إذا مــدت مخالبـهـا / تدركك لو كنت في جو السما العالـي
ما قرت الاسد في عالـي مراقبهـا/ تسعى على الرزق ما حنت للاشبالـي
والشمس في برجها والغيم يحجبهـا/ تقفي وتقبل لها في العـرش مجدالـى
رب السماوات يا محصي كواكبهـا/ يا مجري السفن في لجـات الأهوالـي
ضاقت بنا الأرض واشتبت شبايبهـا/ والغيث محبوس يا معبـود يـا والـي
يـا الله مـن مزنـةٍ هبـت هبايبهـا / رعادها بات له فـي البحـر زلزالـي
ريح العوالي مـن المنشـا تجاذبهـا / جذب الدلى من جباء مطويـة الجالـي
ديمومـةٍ سبلـت وأرخـت ذوايبهـا / وانهل منهـا غزيـر الوبـل همالـي
تسقي دياراً شديـد الوقـت حاربهـا / ما عاد فيها لبعـض النـاس منزالـي
يا جاهـل اسمـع تماثيـلاً مرتبهـا/ فيها معانـي جميـع القيـل والقالـي
مثل المحابيـب زادت فـي قوالبهـا/ في صرفها زايده عن قرش واريالـي
يا ربي توبـه وروحـي لا تعذبهـا / يوم القيامه إذا مـا ضاقـت اعمالـي
وازكى صلاةٍ على المختار نوهبهـا / شفيعنـا يـوم حشـرٍ فيـه الأهوالـي
وهذي قصيدتين لشاعر مفرح الظمني:
هواي جويدل دلها زين ** تلعب وتضحك والمبيسم ذبوحي
حبيتها حب الشرف للشريفين ** قلبي عليها مثل ورع شفوحي
ورع يذاود عبرته والدهر شين ** البيت خالي والرعايا سروحي
وجدي عليها وجد من حده الدين ** قليل مال ولا المدين سموحي
او وجد من جاروا عليه السلاطين ** بالسجن مضيوم قليل الشبوحي
او وجد عود واصل عمر تسعين ** ماتوا عياله والقريب شحوحي
او وجد عذرى زوجوها مسيكين ** تبغى الفراق وكل يومن طموحي
بليت بعفش مايعرف القوانين ** وجهه كريه وبالعطايا شحوحي
ياليت عمري ياعرب وقم عشرين ** والحق هوى بالي واداوي جروحي
فيما مضى نمشي بروض وبساتين ** يرقص لنا غصن الهوى بالمزوحي
واليوم في بيتي كسير الجناحين ** عاجز وشيبي في الصوابر يلوحي
امسي بهم ويصبح الهم همين ** هم يراودني وهم يروحي
يالله ياغافر ذنوب المصلين ** ياواحدن تدري بحالي وتوحي
تغفر ذنوبي يوم عرض الموازين ** وانت اللذي لذنوب عبدك دموحي
( قصيدة أخرى له )
يالمعلم دخت من كثر الكتابه = حضرتي للدرس من كبر المصايب
دفتر التعليم قلبي ماشقابه = شقوتي في صاحبي ضافي الذوايب
يالمعلم لاتطالبني طلابه =شل قراطيسك وجوز من الطلايب
لاتلوم اللي تعذب في شبابه = عذبه طفل مع البدوان غايب
صاحبي يم النفود اقفت ركابه = حالف لانصاه لو دونه نشايب
لو تشوفه يالمعلم في ثيابه = كان تصبح من جميع الدرس تايب
وهذي لشاعر محسن الهزاني:
ألف وليف الروح قبل أمس زرناه
غرو يسلي عن جميع المعاني
والبا بقلبي شيد القصر مبناه
وادعى مباني غيرهم مرمهاني
والتا تراني كما اوحيت طرياه
أفز لو حلو الكرى قد غشاني
والثا ثلوم القلب ما احد بـ يرفاه
إلا ان خلي من عذابه سقاني
والجيم جيته ما تردى لمن جاه
يقول: حي اللي عناني وجاني
والحا حليه يم نجران مرباه
ريم رعى نبت الدعث والمجاني
والخا خليلي ما تجارح سطاياه
بضامري علق سطير العراني
والدال دوك القلب من حر مسطاه
جرح فلو جبت الدوا ما شفاني
والذال ذهب الحواجر بيمناه
أصابعه تزهى الخواتم ثماني
والرا روايح ريحة المسك وياه
ريحة زباد فاح أو زعفراني
والزا زبر جمعه ولا احرز ملاقاه
مال اجنبي بقول راعي المجاني
والسين سم الحال والعقل بصباه
باربع محاحيل تجر السواني
والشين شبهته طليع بحرباه
ما يشرب إلا در عرب سماني
والصاد صاب القلب الدرج ما اخطاه
قلت: آه وا عزاه دمي كساني
والضاد ظبيان المها كلها فداه
ويلاه من ربي بحبه بلاني
والطا طويت الياس منه ورجواه
لو كان ساعفني فـ باكر جفاني
والظاء ضنيت حالي ولا فاه
قلت الوداع وقال هذا مكاني
والعين عامين وانا ادور لاماه
أجيه إلي غاب القمر والهداني
والغين غاب وفسد الترف بعداه
أجيه حذر بالغبا والبياني
والفاء فكر ويش رايه وطرياه
هو حب قلب لو مودة لساني
والقاف قلت اقلط وخذ ما تمناه
ما شاف غطروف صخيف الثماني
والكاف كيفي طاب والحمد لله
إلى حصل قصدي ترى العمر فاني
واللام لايمنى عسى الويل بفجاه
ما شاف الذي ربي بحبه بلاني
والميم ما والله لقيناه حلاياه
لا في البدو يذكر ولا في المباني
والنون نوره من سرى الليل جداه
مثل الفنر والا القمر يوم باني
والواو وا يوم على السطح وياه
أشرب من مبيسم رهيف الثماني
والهاء هيضني بها زين شقاه
كنه لطراد الهوى معشراني
ولام الف لا يمنى صفعته، وقال آه
لا يا بعد من لي قريب وداني
والياء يسقيني معسل شفاياه
ولو جفيته عايفه ما جفاني
وهذي لشاعر نمر بن عدوان :
البارحـــه يـــوم الخلايق نيــامــا..... بيحت من كثر البكا كل مكنون
قمت اتوجد وانثر الماء على ما..... من موق عين دمعها كان مخزون
ولى ونة من سمعها مايناما..... كني صويب بين الاضلاع مطعون
وإلا كما ونت كسير السلاما..... خلوه ربعه للمعادين مديون
في ساعة قل الرجا والمحاما..... في ما يطلع يومهم عنه يقفون
وإلا كما ونت راعبية حماما..... غاد ذكرها والقوانيص يرمون
تسمع لها بين الجرايد حطاما..... من نوحها تدعي المواليف يبكون
وإلا خلوج سابية للهياما..... على حوار ضايع في ضحى الكون
وإلا حوار نشقوله شماما..... وهي تطالع يوم جروه بعيون
يردون مثله والظوامي سياما..... ترزموا معها وقامو يحنون
وإلا رضيع جرعوه الفطاما..... توفت امه قبل اربعينه يتمون
عليك ياشارب لكاس الحماما..... صرف بتقدير من الله مأذون
جاه القضاء من بعد شهر الصياما..... صافي الجبين بثاني العيد مدفون
كسوه من بيض الخرق ثوب خاما..... وقاموا عليه من الترايب يهلون
راحوا بها حروة صلاة الاماما..... عند الدفن قاموا لها الله يدعون
برضاه والجنة وحسن الختام..... ودموع عيني فوق خدي يهلون
حطوه في قبر غطاه الهداما..... في مهمة من عرب الامات مسكون
ياحفرة يسقي ثراك الغماما..... مزن من الرحمة عليها يصبون
جعل البخري والنفل والخزاما..... ينبت على قبر به العذب مدفون
مرحوم ياللي ما مشى بالملاما..... جيران بيته راح ما منه يشكون
ياوسع عذري وان هجرت المناما..... ورافقت من عقب العقل كل مجنون
اخذت انا وياه سبعة اعواما..... مع مثلهن في كيف مالها لون
والله كنه يا عرب صرف عاما..... ياعونة الله صرف الايام وشلون
واكبر همومي من بزور يتاما..... وان شفتهم قدام وجهي يصيحون
وان قلت لا تبكون قالوا علاما..... نبكي ويبكي مثلنا كل محزون
لا قلت وش تبكون؟ قالوا يتاما..... قلت اليتيم اياي وانتم تسجون
قمت اتشكا عند ربع اعداماما..... وجوني على فرقا خليلي يعزون
قالوا تجوز وانس لامه بلاما..... ترى العذارى عن بعضهم يسلون
قلت انها لي وفت بالولاما..... ولو جمعتم نصفهن ما يسدون
ما ظنتي تلقون مثله حراما..... ايضا ولا فيهن على السر مامون
واخاف انا من عاديات الذماما..... اللي على ضيم الدهر ما يتاقون
أو خبلة ما عقلها بالتماما..... تضحك وهي تلدغ على الكبد بالهون
توذي عيالي بالنهر والكلاما..... وانا تجرعني المر بصحون
والله لولا هالصغار اليتاما..... وخايف عليهم من الدجه يضيعون
لقول كل البيض عقبه حراما..... واصبر كما يصبر على الحبس مسجون
عليه مني كل يوم سلاما..... عدة حجيج البيت واللي يطوفون
وصلوا على سيد جميع الاناما..... على النبي يللي حضرتوا تصلون
وهذا ما وفقني فيه ربي ...
وارجواا (((((التثبيت))))) للموضوع للكم الهائل من القصائد الرائعه
وشكراااا.....~