وهي لشاعر الامير محمد الاحمد السديري:
يقول من عدى على راس عالي = رجم طويلٍ يدهله كل قرناس
في راس مرجومٍ عسير المنالي = تلعب به الأرياح مع كل نسناس
في مهمهٍ قفرٍ من الناس خالي = يشتاق له من حس بالقلب هوجاس
قعدت في راسه وحيدٍ لحالي = براس الطويل ملابقه تقل حراس
متذكرٍ في مرقبي وش غدالي = وصفقت بالكفين ياسٍ على ياس
أخذت أعد ايامها والليالي = دنيا تقلب ما عرفنا لها قياس
كم فرقت مابين غالي وغالي = لوشفت منها ربح ترجع للأفلاس
ياما هفا به من رجالٍ مدالي = ماكنهم ركبوا على قب الأفراس
ولا قلطوهن للكمين الموالي = ولاصار فوق ظهورهن قطف الأنفاس
ولا رددوا صم الرمك للتوالي = كلٍ يبي من زايد الفعل نوماس
من بينهم سمر القنا والسلالي = مثل البروق برايح ليلة ادماس
يقطعك دنيا مالها أول وتالي = لو اضحكت للغبن تقرع بالأجراس
المستريح اللي من العقل خالي = ماهوب بلجات الهواجيس غطاس
ما هوب مثلي مشكلاته جلالي = ازريت اسجلهن بحبرٍ وقرطاس
حملي ثقيل وشايله باحتمالي = واصبر على مر الليالي والأتعاس
وارسي كما ترسي رواس الجبالي = ولا يشتكي ضلعٍ عليه القدم داس
يا بجاد شب النار وادن الدلالي = واحمس لنا يا بجاد ما يقعد الراس
ودقه بنجرٍ يا ظريف العيالي = يجذب لنا ربعٍ على أكوار جلاس
وزله إلى منه رقد كل سالي = وخله يفوح وقنّن الهيل بقياس
وصبه ومدّه ياكريم السبالي = يبعد همومي يوم اشمه بالأنفاس
فنجال يغدى ما تصور ببالي = وروابع تضرب بها اخماس واسداس
لاخاب ظني بالرفيق الموالي = مالي مشاريه على نايد الناس
لعل قصرٍ مايجي له اظلالي = ينهّد من عالي مبانيه للساس
لاصار ماهو مدهلٍ للرجالي = وملجا لمن هو يشكي الظيم والباس
بحسناك يا منشي حقوق الخيالي = ياخالق أجناس ويا مفني أجناس
تجعل مقره دارس العهد بالي = صحصاح دودٍ دارسٍ مابه اوناس
البوم في تالي الهدامه يلالي = جزاك يا قصر الخنا وكر الأدناس
متى تربع دارنا والمفالي = وتخضّر فياض عقب ما هي يبّاس
نشوف فيها الديدحان متوالي = مثل الرعاف بخصر مدقوق الالعاس
وينثر علي البيدا سوات الزوالي = يشرق حماره شرقت الصبغ بالكاس
وتكبر دفوف معبسات الشمالي = ويبني عليهنّ الشحم مثل الأطعاس
وهذي لشاعر سليمان بن شريم:
يا من لـ . عين.. في محاجيرها شوك
والقلب به.. عن لذة النوم.. تكاك
لي دك في قلبي.. من الهم داكوك
جاوبت طربان الحمايم . على الراك
عزي لحالك.. يا عزيز.. وأنا أبوك
كان الزمان اللي وطاني.. توطاك
أمشي.. وكني.. يا عزيز.. بتابوك
في حبيس جبار . تحت حكم الأتراك
على عشير.. دونه الباب.. مصكوك
ما غير امره.. واتعداه.. مناك
باب.. وراه احروس.. ما هو بمفكوك
ومبرز.. دونه.. مكاين وشباك
وبقيت أنا في حضرة الوقت.. مملوك
دولة زمان.. بين جاك وتعداك
افهم وصاتي.. يا عزيز.. وأنا بوك
دامك صغير.. غاية العلم.. يقراك
تراه ما ينعفك خالك.. ولا أخوك
لي صار ما تقضي لزومك بيمناك
وربعك.. إلى بان الخلل فيك.. عافوك
أقرب قريب لك من الناس.. يشناك
إن كثر ملك.. قربوا لك.. وحبوك
وإن قل ما بيديك.. شانت سجاياك
لو تطلب الما.. عندهم.. كان ما أسقوك
إبعد مزارك.. عن وطنهم ومرباك
إن جاد حظك.. صدقوا لك . .وزاورك
وإن بار.. كل ما يبي غير.. فرقاك
وإلى اعتراض لك من صروف النيا صوك
كل تبرًا منك.. ما هو وياك
وهراجة المجلس.. إلى جيت.. وروك
منازل.. تطرب نظيرك بدنياك
وإلى قضوا منك اللوازم.. وخلود
تفرقوا.. وأنت احتمل.. كل ما جاك
كنك سراج البيت.. للنور.. شبوك
وإلى قضى اللازم حدا الربع طفاك
وإلا كما.. ليمونة الحمض.. مصوك
وإلى قضى منه الطعم فرغوا لذاك
واللي يجي من رفقته.. ريب وشكوك
احذر عنه.. لياك تصدق بمسراك
والى جفوك أهل الوطن.. واستخفوك
قلع غريسك منه.. واهدم ركاياك
تراك.. لو تمشي على الرجل.. صعلوك
أحسن.. من اللي تلتجي له.. وياطاك
عطهم.. وضيفهم.. إلي منهم.. جوك
وغلق ضميرك.. لا تعلم بقصياك
إن طبت.. ما حبوك، وإن عبت.. زالوك
تمضي حياتك.. ناقل داك.. برداك
والي نفوك من الوظيفة.. وعافوك
خفت موازينك.. وكل تهقواك
وخدمتك شيخ.. كنك العبد مملوك
يامرك.. فيما يشتهي، وانت ينهاك
اعرف تراك مبرقع منه.. مشبوك
حدرك في حبل المهالك.. ولا ارقاك
واصحا لخلان الرخا.. لو تغالوك
اعرف ترى اطيبهم إلى احتجت يجفاك
كنك خوي "مقيط".. دهووك، واغولك
وحقك.. عطاك رشاك، واقفي، وخلاك
واحذر عن العيلة.. ترى الحق مدروك
مثل القضا يدركك.. ما منه فكاك
وإن كان عدوانك على الضيق.. حدوك
اخصم طلابتهم.. بعجفاك واقداك
وإن كانهم.. لمشرف الحق.. ماشوك
ناظر مطاليع الفرج.. قبل مبداك
وإن طاوعوا شيطان الأنفس.. وهانوك
فاصبر على البلوى.. ودفنه رزاياك
زرهم.. تراك اليا توانيت.. زاروك
إن ما بديت.. بصاحب السو.. يبداك
ما دامهم.. ما طاوعوا لك.. وعرفوك
اضرب على الكايد.. الى عمست ارياك
لو هذبوك من المصايب.. وضدوك
ما يذبحونك.. قبل تدني مناياك
والحم عن الجاهل ترى الحلم مبروك
وقم للضعيف اللي من الضيم ينخاك
وادمج خطا جيران بيتك.. إلى اوذوك
ترى القصير، وحرمة الجار.. بحماك
عطهم رواتب حقهم.. لو تناوسك
في كل ما يصلح.. لدينك ودنياك
وقم للضيوف الي عنوا لك.. وضافوك
أعلى كرامتهم: احجاجك.. وبشراك
واعرف ترى مالك من الضيف مشروك
لولاه يطلب حاجته منك.. ما جاك
وقم للرجال أن ريحوا لك.. وحبوك
واحشم خويك، واكرمه.. عند ملفاك
والي اعتبرت بسيرة الناس.. كفوك
ما كثر من شيء.. تعبته، وعناك
ولا تبات بهم دنياك.. مضنوك
ما طاب لك.. ما دام لك.. وافتهم ذاك
لو يطلبون اخفايك الناس ما أخفوك
والرجل.. مثل النجم.. في كل الأفلاك
وصلاة ربي.. عد الأوراق والشوك
وما ناض براق.. وما هل سفاك
على الذي.. ما فيه ريب.. ولا شكوك
محمد.. ما دك بالقلب.. دكاك
وهذي لشاعر ضيف الله العفار:
اونتـــي ونــيت واقــبلت واقــفيت 0 0 0 0 ونــيت ابيــن للعــرب ماطرى لــي
ونــيت واخــفيت وابــديت مااخـفيت 0 0 0 0 بــغيت اضيـع مذهبي من هبالـــي
ونيتـــها يـــوم انهم طـــــووا البيت 0 0 0 0 ياطــــي قلبـــي طيهم للحبالــــي
رعيت لــــي وسمية ميــــر ماابطيت 0 0 0 0 ياليتنـــــي سجيت فيها ليالـــــي
مــــن يــــوم رحت مسير ثــــم رديت 0 0 0 0 اليا ان منزل عدم الاجناس خالــــي
بكيت انـــا وابكيت حتــى هل البيت 0 0 0 0 وصبرت صبـــر مثقلات الجمالــــي
ياخــــال ياريــــف المراميـــل ياليت 0 0 0 0 ياليت مــن ربــي عليها العيالـــي
وهذي لشاعر مرشد البذال:
يحول أشوف الحق جتني طروشه ـــــــــ جتني مطاليبه وانا عنه منحاش
اليوم كن بداخل الصدر هوشه ـــــــــــ مثل اختراش الريم في داخل الجاش
يالله عسى عطفك ولطفك نحوشه ــــــــــ يالله بحسن الخاتمه عند الاقراش
دنياك لو تعطيك زين المعوشه ــــــــــــ تالي سوالفها تعود على ماش
ياما خذينا بأول العمر شوشه ــــــــــــ وياما مشينا في مظاهير وأدباش
في خايعٍ وبل الثريا رشوشه ـــــــــــ نجن الزبيدي في صحاصيح ودشاش
وياما جلسنا مع مرودع نقوشه ـــــــــــ في سهلةٍ ماحدرنا زل وفراش
في وسط روضٍ مخضراتٍ خفوشه ــــــــــ نبته جديد ومبعدينٍ عن الطاش
نبنوب لا خبله ولا أهي مخروشه ــــــــــ عنق الفريد ان ذيره زول حشاش
قامت تخاطبني بنفسٍ هشوشه ــــــــــــ بس الكلام وعرضه أبيض من الشاش
بسرار في وسط القلوب مخشوشه ــــــــــ بين الثنين ولا درى عنهن الواش
ربعة وفا ولا السلب ماننوشه ـــــــــــ ماني لوجه معذب الحب خماش
واليوم مالي مع هل الصيد نوشه ــــــــــ عطيتها غيري بلاسوم ببلاش
عند الطبيب وصار عندي وحوشه ــــــــــ ومن الإقامة صابني خوف وخراش
ذالحين شفني جالسٍ عقب دوشه ــــــــــ أصلب عضاي وكن بالجسم هشهاش
خليت ديواني ومجلاس حوشه ــــــــــــ عقب المعزة ساكنٍ دار الإنعاش
والنفس ضاقت عقب ماهي بشوشه ــــــــــ مثل المقيم اللي على نو مطراش
وهذي لشاعر زيد بن غيام :
يامل قلب عذبه كثر الأنواع
يبي الطمع مير الطمع يخلف الطوع
والله يالولا زرفلة شقح الأقطاع
وآقول اباخذ لي مع البدو قرطوع
لاصير في قصر لاروع ولاروع
لاهالك ظامي ولاميت جوع
مار البلا وان طاح بالصلب رماع
وشدوا له الجبلان مع بينة الشوع
تلقى لهم من عند ابا القد مرماع
ماعبروا في عرفج الشق مقطوع
حزم غدا لقليقلانه تمرياع
والرمث ينبت في مذاريه طالوع
في مربع وان جاه راع الغنم ضاع
تلقى الجوازي خنس فيه ورتوع
وأحب هد الطير والطرش منداع
شرق من المجذم شمال من الكوع
الى حصل صفق الحباري مع القاع
والله ماغبط اللي يصوع الذهب صوع
وهذي لشاعر راكان بن حثلين :
لاواهني ياطير منهـو معـك حـام والا انت تنقل لي حمايض علومـي
ان كان لامن حمت وجهك على الشام بايسر مغيب سهيل تبغـى تحومـي
باكتب معك مكتـوب سـر ولا الام ملفاه ربـع كـل ابوهـم قرومـي
سلم علـى ربـع تنشـد بالاعـلام لا واهني من شافهـم ربـع يومـي
ومن سايلك مني فانا من بنـي يـام من لابة بالضيق تقضـي اللزومـي
ربعي ورا الصمان وانـا بـالاروام من دونهم يزمـي بعيـد الرجومـي
ومن دونهم حوران ضلع بعـد زام دار اهلهـا مـا تعـرف السلومـي
حال البحر من دونهـم لـه تليطـام ومن دونهم مايـات مـوج تعومـي
من عقب ما سيفي على الضد حطام اليوم سيفي جادعـه كنـه شومـي
صارت سوالفنا معي مثل الاحـلام مالي جـدا يكـون عـد النجومـي
لا من ذكرت رموس عصر لنـا دام قمـت اتملمـل والخلايـق نيومـي
يالله ياللي طالبه مـا هـو يضـام تفرج لشخص لاجـي عنـد قومـي
الله من عيـن لهـا سبعـة اعـوام تسهر وتبكي من كثيـر الهمومـي
الحال باد وباقـي الجسـم وعظـام كنـي مريـض واقـع ومحمومـي
وقعت انا في ديرة ما بهـا اسـلام والبن الاشقر مـا يـدار معدومـي
سجين سجن ولاجـي عنـد ظـلام ودوني بحور وبالحديـد محزومـي
والجفن يسهر تالي الليـل مـا نـام ومن جملة الكيفات صرت محرومي
وعزي لمن مثل عليه الدهـر هـام مقصور رجل ولا جزع ما يشومي
وصلاة ربي عد من يلبـس حـرام واعداد ما تذري ذواري السمومـي
علـى نبـي خصـه الله بالاكـرام على جميع الخلق صـار محشومـي