أنا اليـا شديـت سـرج القرايـح=أتعبـت فكـر منقحيـن القريحـه
نقع الصفى وبل (ن)من الغر طايح=شرايـده مالهـا بالافكـار ليحـه
نوادره ماهـي ضحـوك ومزايـح=لاضاقبه صدر(ن)تزاحـم فحيحـه
شعري بخور بمجلس الطيب فايـح=يبعد ويتعب فكر من شـم ريحـه
بالشعر ماأخذ من أبحور(ن)ضحايح=ولاأكتب شعر معنى البحور القبيحه
ماأخذت شعري بالسلف والمنايـح=بأعمق بحر معناي ماهـو منيحـه
الشعـر ماقلتـه نفـاق ومدايح= الله يبيـح الهاجـس الله يبيحـه
وين أنت بي ياهاجس الشعر رايح= معناي من دونه ثمانين طيحه
خذت من شعري دروس و نصايـح=ماأنسى منه قبل سنتين النصيحـه
يوم الحمام بعالي الصـوت نايـح=بالشعر عالجت القلوب الجريحـه
وان كان في متن المزون الروايـح=مكان عز النفـس بـه مستريحـه
غناة نفسـي بالليـال الشحايـح=في عز نفسي ياليديـن الشحيحـه
وأن بيعت النخوه بسوق الذبايـح=عندي لها النفس العزيزة ذبيحـه
تكـرم معرفـة طيبيـن الشرايـح=المعذرة ياهـل الوجيـه الفليحـه
شعر| علي سعود