[رشيد]

تعال ابرضي مرادك وأرضي مرادي
سؤال صدك وصدي واضحٍ حله
وشو له اسرح بوادي وانت في وادي؟
والكل منّا عزيز ويكره الذلة
هذا طريق السعادة والله الهادي
ما فيه داعي نضيع ودربنا ندله
ادري تبيني اجيك وماتبي تنادي
مثلي وانا اضحك ودمعي دايم اهله
المشكلة اني شرابك وانت لي زادي
بس البلا إنّا نعقد حبال منحله
يكفي عنادك ويكفي مني عنادي
أوضاعنا سبة الإنكار مختلة
اترك كلام التحدي: منهو البادي؟
الكل منّا على الثاني يبي الزلة
توجعني وتقول: صدك ثالث اعيادي
واكمام ثوبك من الهجران مبتلة
نكذب نكابر نقول: إن الوضَع عادي
ادري وتدري وكلٍ ميت بخله
أنا ادري انك بدوني تايه وغادي
وانا بدونك حزين وعلتي علة
اعرف بلادك ومثلي تعرف بلادي
ما فيه داعي نضيع ودربنا ندله

.

اسم القصيده وقائلها :
" ما فيه داعي نضيع "
للشاعر المبدع // فيصل بن سبيّل الباهلي

الموضوع الأصلي: ما فيه داعي نضيع | | الكاتب: رشيد | | المصدر: شبكة بني عبس