قـال الشاعـر نجـا الـرشــيـدي بوصف القهوه
البارحه سهـران في هجعـة النـاس = عـيـني همومن بالحشا مسهـرتهـا
العـيـن مانامـت ولاطـبهــا نـعــاس = تـقــول سـلاة النخــل مـطـرفــتـهــا
طارن علي من الهواجيس هوجاس = فـكــرت بـاولهـا وفـي تـالـيـتــهــا
اكـيل فـي مكيال فـكـري والاحسـاس = واردها عـن ظيقهـا فـي سعـتـهــا
قمت اضرب الافكار بااخماس واسداس = وعيني تفيض بعبرتن كاتمتها
لياقـلت هـانت ردها بالحشـا اللياس = الله يعـجـل بـالـفــرج خـاتــمــتـهــا
وسويت فنجالن يعالج خواء الراس = في دلتـن جمر الغضا من تحتهـا
قلبت حمستها على اطراف محماس = يمناي قـبل احـراق حبه جـذتهـا
ودنيت من صوته يهجرس تهجراس = نجـرن يـده جتها يـدن لاعـبـتهـا
وقـنـنت طبخـتهـاعلى الكيف بقـياس = وقــدرت قـيمة هيلهـا وقـهـوتهـا
عطرن هواء ريحه مغـذي للاانـفاس = لياشمته نفس العـليل اشتهـتهـا
خـافـه يهـدي خاطـرن فـيه وسواس = وتـبرد جروحن مهجتي مخفيتهـا
الشاعر/ فيصل نجا الرشيدي يرد على والده ويصف القهوه
قم ياقصيدي وأنتفض وأقضب الفاس = وهات الغضاة القاسيه في صفتها
وشب القوافي لايجي لعينــي عمـاس = ترى الطواري داخلي مجـــهمتها
وسو أشقرٍ بنه يداوي هـــــل الباس = في دلــةٍ ياما السمـــر قــد حمتها
وصب المعاني وأكتب الصدر قرطاس = النفس ظاقت والسما ماســعتها
جتــني المعــــاني كنــهــا در وألماس = وأغلـى من بنيات فيصل سمتها
من غاليٍ في خاطر الشـعر نـبراس = يمناه لوتبغى النجــــــوم وصلتها
يالعنبـــــوهــمٍ تقـل دقـاقـة اجـراس = ولي ياهجوسٍ كـل نفـــــسٍ هجتها
لاطبت ياراسي ولا طـاب الاوناس = لين أعرف منين الهجوس وجهتها
وأجهم وأغوص الــيم للهم عساس = واكبح جمــــــوحٍ تبتـــرم ساقيتها
وأعقل رحول الغـــدرفي صدر الانجاس = وأبذل نفيسٍ في يدي مبذلتها
يابوي انا ماعنــدي الا نت بالناس = وروحي لك اليمنى وهذي صفتها