كل درب(ن) راعـي الفكـس أر هـازه=ماجهل فـي خدمتـه غيـر الغشيمـي
أختـبـار ياسـعـد تــم اجـتـيـازه=مامدحتـه ليـن حصـلـت السليـمـي
ان نظـرت الزيـن كـل الزيـن حـازه=في المواتـر هقوتـي شكلـه عديمـي
وان غسلتـه كنـه كاسيتـه قــزازه=فيـه خـط(ن) كنـه حـزام القديـمـي
جيب(ن) أبيـض تـو مـاورد طـرازه=مداد الهـم ماشـي وحمـود الجهيمـي
يشترونـه دايــم الأجــواد عــازه=يدفعونـه للخصيـم لأبـن الخصيـمـي
منـوة الــي يحتسـونـه لـلأجـازه=طيـع شـوري لايفوتـك ياالحزيـمـي
وان بغيـت الـي فريـد(ن) فأمتـيـازه=ان نصيـت البازعـي تلقـا البريـمـي
ماحلـى قـدم المـعـازي بارتـكـازه=زيـن مشيـه فالطريـق المستقيـمـي
لاسـرى فالليـل ثـم شبيـت غــازه=لاسطعتـه يرتبـش مـنـه العليـمـي
زين مشيـه فالصحـاري مـع عـزازه=ويتمشـى فالخـلا مشـي الحشيـمـي
وقام يلعـب فـي قفـاه أنتـل جهـازه=لعب صف(ن) شاشه(ن) في حفلة كريمي
جاب صف عيـال فـي حفلـة جـوازه=شاشهـم مـوال مستـور العصيـمـي
وأن مشـى فالهـون يعجبـك أهتـزازه=ويطـرب السـواق فالمشـي الهميمـي
ومن نوى فالحمل قبـل الشيـل هـازه=خلـي علمـي يالحزيمـي فالصميمـي
لاتشـجـع موتر(ن)مـثـل الجـنـازه=عانـه نوعـه فالمعـارض فالنسيمـي
كـل طيـب ياسعـد بالطيـب جــازه=مايفيـدك راعـي العـظـم الرميـمـي
وخابـرك شاعـر ولا عنـدك حـزازه=تاج راسـي ياالحزيمـي مـن قديمـي
للشاعر/مرير بن عبدالمحسن الحبيل العتيبي