السلام عليكم ورحمة الله وبركاته:
هذه محاورة بين الشاعر ناصر خنيفر والشاعر مسري:
ناصر خنيفر:
يابوعقالن على راسك غدى قسمتين=ظبط عقالك ونشد عن غياب الصحيب
حنا ماغبنا ولكن راحت محاربين=واليوم خذها من اللي يلطمون الحريب
مسري:
راع العقال المسمى معه عقل فطين=واحذر عقاله ينوشك كان وانك لبيب
ياربعنا جعلكم طول الزمن حاضرين=واللي يبا يبلش العربان اقول اله عيب
ناصر خنيفر:
يامسري انته من ايا ناس بالمسلمين=حنا سالناك وانته لازم انك تجيب
مادام ناوبت عن ذيبان ذرب اليمين=خلك خوي معي يامن ومرتك حبيب
مسري:
انا من اللي لهم كل القواسي تلين=في ساعة راس مفطوم الرضاعه يشيب
نايب عن الصاحب اللي باللوازم يبين=روح وانا اقفاك ياناصر ووضعك صعيب
ناصر خنيفر:
الناس وجد وكل فيه زين وشين=ولاني بقاصيك كانك مانت رجل غريب
لعل فيك بركه ويصير رايك سمين=يانبت عن صاحب عامين ليه طليب
مسري:
الناس احد ذيب واحد يشبه ام القرين=وانا من اللي لهم في كل مرقب قنيب
صاحبك ياصاحبي ماحط له بيت طين=اما نزل بالوعر والا بجال الشعيب
ناصر خنيفر:
صيح لكن علام العلم عيا يبين=وحنا ننشدك من صبح الضحى للمغيب
ماقول فيكم قصور وكلنا غانمين=لكن حنا نزود بدون شك وريب
مسري:
ماعندنا مشكله لكن ربك يعين=عند الشدايد تبا تعرف جميع النصيب
والكم كذلك لكن القوم راحوا لوين=شيخونا روحوا والمشكله بالطبيب
ناصر خنيفر:
روح وذب الحداء مابين ضلع وبطين=والرمي يخطي ولكن فيه رمي يصيب
لاتخاف وش علمكم يااصحاب متخوفين=كرسيكم ماعليه الخوف سحبه صعيب
مسري:
مدام هاذي علومك صيح ياابالحصين=تضبح بصوتك وجاك مع الخفا صوت ذيب
ماخاف رجل معه بالوقت جنب متين=الضلع ثابت وراسي ماش شك وريب
ناصر خنيفر:
من عادتي مانحب الا الكلام الحسين=واما الرديه لاهلها وافتهم ياشبيب
تصبح على خير قبل تعايد القريتين=ماودي اورد مسري يم حام اللهيب
مسري:
اللي يقدم لنا صاعه نرده ثنين=ولو كنت ماخطيت والله ماحصل شق جيب
الساري اللي سرى ياقوم مكسور عين=ماهوب الاول ولاهو ياجماعه غريب
وسلامتكم اتمنى ان تنال اعجابكم...............