يوم جيتي يالغزال المستذيره
وبحتي بسرك على سامعك بحتي
وقفت بي رحلتي في وسط _ديره
غيمها فوقي وزاهي العشب تحتي
وقمت اطالعلك ولي عينٍ بصيره
وطحت مادري وين طحتيبي وطحتي
قصّتك قصّه روايتها مثيره
في بدايتها شرحتي ماشرحتي
ولبا قلبك من يقول انك صغيره
وانتي بنضجك على غيرك رجحتي
لاتكلمتي سلى الورد بعبيره
وفاح يوم بعطرك الورديّ فحتي
وان سكتي صار ماللناس سيره
غير وين بعطرك الفواح رحتي
وفوق هذا حسنك اللي يستثيره
كل قلبٍ لارهنتيبه ربحتي
وسلهمة رمشٍ سلاطينه مغيره
سلهمه تذبح وعدي كم ذبحتي
فاتنه والوقت لو صحّى ضميره
كان مايفرح سوى لامن فرحتي
وكان حَسّ وقال في جمله قصيره:
تنجرح كل القلوب ولانجرحتي
لنّك انتي بس ياشقرا الظفيره
حاسبتها صح وبصحّ اكتسحتي
عالمٍ فيه البدور المستنيره
صوتنلك واستراحن واسترحتي
وصدّقيني لو ماكنتي جديره
بالنجاح اشلون قوليلي نجحتي
يكفي هذا والا اواصل بالمسيره
واطرح باسلوبي اللي ماطرحتي
صاحبك نبض القلم دايم شويره
خطّ لك حرفه وصوّت: لو سمحتي
علميه اللي يقول انك صغيره
إنّك بنضجك على غيرك رجحتي
وِِانّ كل الورد مافاح بعبيره
غير يوم بعطرك الفوّاح فحتي