ارسل لي الشاعر حميد علي الرشيدي هذه القصيده بتاريخ 11/4/1421ه
يقول:
يابن معزي صحت من لايفن لاف =علوم خلتني على الرجل حافي
يابن معزي نية الخير تنعاف= تنعاف لاصارت بناسن ضعافي
الي يعوم مع البحر دون مجداف=ويسبب البلوى وهو مايشافي
عنتر زمانه يملك لسان سياف= وهوشبيه ام الثمان الرهافي
يمشي على وجهين واشكال واصناف= بوجه الوفا يمشي وهو غير وافي
يمهد المشوار في درب مهياف= والياوقعت يقول فيها سنافي
وده يعسف الوقت من دون معساف=وكاد هذا الوقت فيه اختلافي
رديت عليه بهذه القصيده
يامرحبا واعداد ماطاف مطاف= واعداد من صلى بمكه وطافي
برسالتن جتني على اوراق شفاف=حميد يشكيلي عقولن خفافي
يقول بعض الناس خوته تنعاف= لاصار ماهو مع خويه سنافي
وايضا حكى عن قصة ابليس الاشراف= الي يدوبح بالخلى والفيافي
يقول شب النار والنار تنشاف= مغرور في نفسه قصير المطافي
بلشت به وارسلت لك نغمة القاف= عساك تلقالي علاجن يعافي
حميد من دنياه ياضنتي عاف= بسباب هرجن زور مدري زيافي
يبلش به الي بسود اليل ماحاف= ولاثار قدامه غبار وسوافي
كانك بلشت بسورة اقرا والاحقاف= عجزت تفهمها وسقت القوافي
حنا انكبنا بين كاهن وعراف= في وسط سرداب المحن والمهافي
الكاهن اسود راكبله على هاف= دقنه طويل اسود واذانه هطافي
والساحر يشغل جهازات الاسعاف=يرسل نداه ويسمع الرد صافي
واجهتهم من قبل لاالنور ينشاف= في منطقه ضلما بها النور طافي
هاذي قضيتنا مع سنينن عجاف= كانك بلشت بهرج زور وخرافي
يابوعلي لاتصير للهرج مزهاف= سوالفن مابعدها الا العوافي
جاك الجواب الي مضرف بالاضراف= من شاعرن يابو علي معك وافي