خالد بن سكران..الشاعر المتميز أنقل إليكم هذه القصيدة الرائعة..ليكون لنا نصيب الأستمتاع..فمع هذه القصيدة نشعر بالشعر الحقيقي المترابط والرائع في كل معاييره..!!
الليلة هذي واضحة ليلة أفراق=حاولت أعديها وعيت تعدي
بيت يقوله (ثامر) العام بأخراق=واليوم أرده عقب ماباح سدي
أثر الفراق هموم ماهيب تنطاق=من وين مالديت وجهي تلدي
ضاقت بي الدنيا وصدري بعد ضاق=ودي أشق الجيب من ضيق ودي
أفكار تشقيني مع الليل تنساق=وأفكار لازادت همومي تهدي
أضحك وأسولف كن مانيب عشاق=وأنا قتيل العشق من فعل يدي
والعشق كم دمر وكم نشف ارياق=وكم عاشق صد وتندم وردي
وكم عاشق متعب ورى خله الساق=حبل الوصل يرخيه نوب ويشدي
وأنا سماء جوي غيوم وبراق=هبت عواصفها ولابه مصدي
عقب التواصل واللقاء عقب الأشواق=ظروف وقتي صارت اليوم ضدي
بانت بوادر هجر وجروح وإرهاق=ودمع الفراق وسهر ليل وتحدي
ولو قلت ابصبر عنه مانيب مشتاق=أنا أشهد أنه كذب ماهوب جدي
وشلون بصبر والغلا فيه دفاق=وطيفه مخاويني يغيب ويردي
أما يجي ويصير للقلب ترياق=وإلا يروح ودمع عيني بخدي
الليلة هذي بعثرت كل الأوراق=حاولت أعديها وعيت تعدي
أختكم الهنوف