[الاجهر]

اللي بقى لي مع الأيام .. وفّيته=والضيق لو ينهمر تشربْه ودياني
ماهي كبيره علي والحزن غنيته=وْلاهي غريبه إذا وقتي تحداني
الخوف -يا من نبشت القلب وادميته=-لاعشت زهرة شبابك وانت وحداني!!
مطعون ؟ عاااادي ،، جفا الأقراب؟ داويته=تعبان؟ مبطي ،، ردى هالحظ؟ خاواني
صدمه؟ بسيطه ،، هَوان الحال؟ مرّيته=مقرود ؟ أدري ،، وإذا حرمان؟ عدّاني
ما فاح همّ ٍ لك الله ما تقهويته=ما مرّ حزن ٍ بغيري ما تبلاّني!
ياما وياما من الخذلان .. عديته=إلا بصاحبْ .. بعد عِشره تناساني!!
يا قلب صبرك .. ترى كل شيّ سويته=ما كان أفضل من اللي كان بإمكاني
الجرح أرحم .. إذا يرجع من أغليته=مجروح؟ فِدوه .. ولكن صعب وحداني!

الموضوع الأصلي: اللي بقى لي مع الأيام .. وفيته | | الكاتب: الاجهر | | المصدر: شبكة بني عبس