[رسام]

السلام عليكم ورحمة الله وبركاتــه

قصيديتين اشك ان معناهم واحد ..؟

القصيده الاولــى..
..
.

قالت افراق وقلت وش جاب طاريه......قالت ظروفي وقلت اصعب ظروفي..
..

قالت زماني مر..ثم قلت حليه........شوفتك عندي يابعد كل شوفي ..
..
قالت عليك القلب تصفق محانيه......واقول انا مهما قسيتي عطوفي ..
..
ياليت ماشفتك ولاقلت لبيه........وليت الزمان اللي غدر بي يروفي ..
..
كانك تبي فرقاي والبعد ناويه.....روحي فمان الله طول وقوفي ..
..
منهو سعا ببعاد ماعاد نرجيه.....ضيفن خطر ثم راح ماكثر ضيوفي ..
..
قصرت باأحوالي ولا قلت لك ليه......ومديتها بحبال وصلي حروفي ..
..
ووطيت لك قدرن من العز عاليه......ولقيت في غبة بحركم حتوفي ..
..
يالوعة الخفاق خابت هقاويه.......وامطر دموع الوجد في قاع جوفي ..
..
كله سبب غرون من البدو هاويه.........ترف على رمشه تكسر سيوفي ..
..
انعس مع حلوم الليالي واخاويه ....ويطري على بالي بحلو الطيوفي ..
..
واصحى وانا مشتاق بالحيل اناجيه .....واثر الذي ناجيت طيف الهنوفي ..
..
ولي عزتن عيت عليه تجافيه ........ماتقبله نفسي حياة الضعوفي ..
..
ولي لابتن زادت على المشاريه .......ناس تبي تسمع وناسن تشوفي ..
..
قل للحبيب اللي ذبحني تماديه .........ماني بعلى هجره كثير الحسوفي ..
..
هاك القصيد اللي حزينه قوافيه .........منك القلم يبكي وترجف حروفي ..
..
وهات الخفوق اللي من العام ناسيه .........هاته ولاتكثر علي الحلوفي ..
..

بيني وبينك جرح والله لا وفيه........وجرح الهوى مردود والحر يوفي..
...
..
.

القصيده الثانيه

مدري علامك ضايقه .. قولي شفيه....قولي وانا ماجيب للخلـق طـاري
.
انا دخيلك واحـد(ن) لـو عرفتيـه.....زيزوم لاصكّت عليـه الضـواري
..
وانا دخيلك واحد(ن) لـو نخيتيـه....يبيع هالدنيـا ليـا صـار شـاري
..
قالت مشاري..قلت وش جاب طاريه....قالت دخيلك كيف ابنسى مشـاري
..
قلت ايه .. بس انت تقولي نسيتيه...وقلتي بعد مالـه فبالـي طـواري
..
قالت ونبرة صوتها تحتضـر فيـه....وقت الزعـل مانكتفـي بالهّـذاري
..
قلت اتركيه ..وصيّحت.. كيف اخليه.....ماتدري انه وسط الأعماق جـاري
...
هذاك..لو يقسى ترى القلب شاريه...لو كان هو ناري ترى اختار ناري
..
امأنـت ادع لجرحـك الله يشفيـه....بس كنت اباخذ فيك انا منه ثـاري
..
ماعاد لك عندي سوى بيت أغنيـه....وارجوك تستقبل جزيـل اعتـذاري
..
رفعت راس(ن) حالف(ن) ما أوطيه...إلا لربـي هــو بـالآنـام داري
..
واقفيت ودموعي على الخد .. تمليه......امشي وأهذري وين انا وين ساري
..
زجّيت نفسي في دروب آخر التيـه...وفي واقعي ضيّعت حتـى مسـاري
..
شفت الهدف قدّام عيني وانا اخطيه....وشفت الغموض بعالمي صار عاري
...
وسلامتكم

الموضوع الأصلي: قالت افراق وقلت وش جاب طاريه.....قالت ظروفي وقلت اصعب ظروفي | | الكاتب: رسام | | المصدر: شبكة بني عبس