يامدور الهين ترى الكايد احلى
................................ وأسأل مغني كايدات الطروقي
الزين غالي لكن الازين اغلى
...................................ولكل شرايٍ بضاعه وسوقي
النّو عالي والسما فوقه اعلى
....................................لى فاق علمٍ جاه علمٍ يفوقي
الصعب هلى قلت ياصعب سهلا
...............................دامك تبيني فأنت ياصعب شوقي
أحب عسف المهرة الي تغلى
................................وأحب اروض كل طرفٍ يموقي
وأحب اسافر مع سحابٍ تعلى
.................................واحب فوق الغيم لمع البروقي
واحب اساهر بدري الي تجلى
.........................وارسم شعاع الشمس عند الشروقي
يامن على ثاير فؤادي تولى
.................................خلّك على قلب الكرامه شفوقٍ
اكرم عزيزٍ بالعمر مااستذلا
................................يسوق عمره للمشاريف سوقٍ
اخترتك من الناس للقلب خلاّ
................................ ياحيثك مرادي وكيفي وذوقي
مارحت ادور كل زولٍ تحلى
................................لولاك تسوى ماعطيتك خفوقي