الي الجوري
يا طفوله عانك الله من دلع (ملح البنات)
يا طفوله اسأليني عن شقاها .. واوصفه
شيطنه خاوت براءة في عيون ٍ عابثات
سلهمه نامت وقامت من رموش ٍ مسرفه
( سور صين ٍ ) في رماله ينبني كلّه ثبات
لين ماتطيب الخواطر..ثم تقوم وتنسفه
طفلة ٍ ترسم صباح ٍ بين ضحك وامنيات
مترفه نامت مساها.. لين قامت مترفه!
بعنقها قلاده ثمينه تنكسر تصبح شتات..!
لو بغت حاجة وقالوا انك انتي مسرفه
طيش صوت ٍ مع هدوء ٍ انتثر بين الشفاة
فوضوية في جملها.. وكل حرف ٍ تنصفه
شعرها غنّى غروبه .. صوت ليل وامسيات
والنظر ناظر عيونه .. ماتجرأ يطرفه!
ينجرح (ماطى) قدمها من رمال ٍ ناعمات
ولو وصفت الخد ورد ٍ يمكن أني اجحفه..!
طفلة ٍ يسبق خجلها ميزة ٍ لايّة فتاة
ظلّها لو هو تكلّم يمكن انه (يكسفه)
قمت انادي يا صغيرة .. بس ما لصوتي حياة..!
يمكن إني لا زرعته ما تهيّا تقطفه
قالت الا قد سمعته بس لي منّك رجاة!
لا تناديني صغيرة.. زان زولي قم شفه!
قلت لا يهمّك كبيرة .. قالت اعذرني يبات
صغر سنّي فوق متنك دون خوف ٍ يرجفه
قلت هو قمّة عنادك اعتلت له نايفات؟!
جاوبت(ماااني عنيده) .. واطربتني فلسفه!
ذاب صوت ٍ للطفوله.. ماطلع حدّ اللهاة
من ذهوله في وصوفه.. من شقاها تخلفه
يا طفوله عانك الله من دلع ملح البنات
وياطفوله اسأليني عن شقاها واوصفه!!