للي عيوني مغرمه به وللي
القلب ما يرضى يبدله لله
جيت لعيونك ميتٍ فيك علي
ألقى مرادي فيك والقلب عله
عله يوافق نبض قلبك يادِلي
لانه تلخبط ما لقى من يدله
ريحانتي يا ياسميني وفلي
قربك وناسه وابتسامه وفله
والروح دونك مالها من يسلي
والضيق سيفه ما تردد يسله
طلي لحياتي ونوري لي محلي
الحال دونك مظلم ٍ به محله
مثل القمر يا حلوة الوجه طلي
فديت طله ما تشابهها طله
نورك يضوي كل شي ويحلي
الزين لغز, وفي بهاك انت حله
ووجهك اناظر فيه حبي وخلي
وغيرك أصك الباب عنه واخله
جيتك بكلي, واقبلي كل كلي
انا لقيت اللي ابي فيك كله