[االعدهي الرشيدي]

أحس إني رماد بلا حضن نار وبقايا نار
تلاعبه الهبايب واستدار مضيّع دروبه
حسبتك لي وطن من قال لك إني حسبتك دار
وجيت بقلبً أبيض كان عشقك أول ذنوبه
عشقتك قبل أفكّر أعشقك ماجيت لك مختار
مع إن الحب صعب فنظرتي بس أصعب التوبة
رحلتي وانطفى شمع وذبل ورد وبقت أعذار
وقف قلب الحياة وعذرك إن فرقاك مكتوبة
وانا اللي ماخذيت من الحياة إلا الصبر تذكار
وانا ماخذت منك إلا الحكي لو كلّه عذوبة
رحلتي بس دقيّتي بوسط الذاكرة مسمار
محال أطرد ورى لحظة فرح مع أي رعبوبة
تركتيني أجاوب قلبي اللي يسألك وش صار
ظروفك هي سبب غيبتك ! لا..منتي بمغصوبة
قتلك الشك ! طيّب ليه مني تاخذين الثار ؟
تبين فراق ! طيّب ليه ماقلتي يامحبوبة
بلاش من الهوى دام الهوى تلعب به الأقدار
بلاش من الوفاء دام الوفاء في عينك اكذوبة
وانا لأجلك تحريّت السحاب وصرت لك أشجار
عشان إن هزّك البرد أنكسر لك نار مشبوبة
تركتيني رماد بلا حضن نار وبقايا نار
تلاعبه الهبايب واستدار مضيّع دروبه

الموضوع الأصلي: حسبتك لي وطن من قالك اني حسبتك دار | | الكاتب: االعدهي الرشيدي | | المصدر: شبكة بني عبس