يضيق بالي من الفرقى و طاريها
و يرتاح بالي بشوفك يا نظر عيني
اشغلت فكري حبيبي وش تواليها
و في غيبتك دمعة الحرمان تشقيني
امشي مَعَ الناس لكن دون ما اوحيها
و اشلون ابنساك و طيوفك تخاويني
إليا طرى أسمك دموع العين اغطّيها
خوفي من العاذل اللّي ما يدانيني
و إليا طرت لي وصوفك جل باريها
من فيض زينك توزّع للمزاييني
تسبى النواظر بنعس اهداب تسبيها
و من بسمتك تخطف قلوب الملاييني
يا مهجة الروح روحي كيف تشقيها
صمتك ذبحني و نار الشوق تكويني
اقرى الرسايل لأجل نفسي اسليها
و أثر الرسايل عقب عينك تعنيني
ما باقي الاّ طيور الورق الآحيها
اذكر بها احلى الليالي يوم تغليني
بعت المحبه و من اول كنت شاريها
و على الوصل و الموده كنت توصيني
ماتت ورود الغلا ماعدت ترويها
ماتت سبب قسوتك يا نازح البيني
حتى العهود القديمه صرت ناسيها
و لا عاد باقي سوى الذكر تقديني
زادت جروحي و لا غيرك يداويها
ليتك تشوف الخفايا كان تبكيني
ضاقت علي الوسيعه مَعْ مبانيها
اطوي سنين الرجا و اقول يا ويني
قلبي يحبك و عيني ساكن ٍ فيها
لا تنخدع بالعواذل و الشياطيني
في روض قلبي ورودك ليت تسقيها
تعال و اسقي ورود الحب و اسقيني
جاتك حروف الشّعر من قبل اسميها
دوّر عباره تواكب للمضاميني
مشاعر ٍ ما تبي يا كود غاليها
و امنتك الله حبيبي لا تخليني ..!!