ابعث تحيات وغلا واصدق شعور
وانظم من الاشواق لك اعذب الرمس
يا ملهمة الاحساس يا شعلة النور
لايق عليك اسمك ليا قيل لك شمس
سبحان من ابدع جمالك كما الحور
ما يشبهك مخلوق بالشكل والهمس
لامن حضرتي تنبت وروود وزهور
ومن بسمتك يشتت الخاطر العمس
قلبي وطن واحساسك الشعب والسور
كل يوم اشوفك شيء فارق عن الأمس
لو بيني وبينك مسافات وبحور
اسوق رجلي لو ورى مطلع الشمس
يا جعل يسلم والدك طيب الشور
اللي له الشيخان تبصم على الخمس
قرم ٍ بفعل الطيب والجود مشهور
اشهر من المرسدس والرنج والجمس
له في صحاف المجد بصمه ودستور
ويا حمس قلب اللّي عدم خوّته حمس
عون الرفيق الليّ شكى الهم والجور
والاّ العدو إليا اعتدى يطمسه طمس
جزل العطايا بالكرم امبراطور
يفداه منهو منغمس بالبخل غمس
يا جعل يبطي حي ويعيش مسرور
ويفداه اهل لندن وباريس والنمس
يا شمس صغت امن الفكر اصدق شعور
يالله عساه يلامس احساسكم لمس