ساقت الطرق الجنوبي ذعاذيع الهبوب=ياسلام الله من أبها على دار السلام
يانديمي بين غيم ونسناس لعوب=نبًه السوده وعيا من البارح ينام
ذب صوتك لاتدردى ولا تبدى هيوب=وأذكر الله لا تهوجس ولا تخشى ملام
أنت ضيف البرق وأبها وصبيان الجنوب=وين مامديت كفك يصافحك الغمام
فز..واقف وأزعج الطرق من بال طروب=لين تزهى بالقصايد ويزهاك المقام
أنت فـ أبها حادي النوق وأبها ماتتوب= من غرور ملامس المزن لشعفة السنام
ياكثر ماودها اليوم تحظنك وتذوب=لاتلوم أبها من الشوق ماتقوى الكلام
نوب يتلعثم مطرها من الفرحه ونوب=ينتشي حس الرعايد وتغريد الحمام
"يانما"مرباك غالي وملفاك محسوب=علًق الراية على صدرك وسام
أنت بين أهلك وناسك مقدر وحبوب=بين ربعٍ يعجبونك ليا أنمس الحزام
بيض الله وجه الأجواد بيضان القلوب=عد من كبًر وهلًل ومن صلى وصام
مساعد الرشيدي