قصيده لشاعر عادل الذيابي
طــال السكوت وضاق صدر السواليف
والبــال من كثر الهواجيس عايف
والليل طال وطارق الصبح ...ماشيف
وانا وصـمت الحزن صرنا...ولايف
اسبح مع هجس الطواريق وآعيـف
هجسـي وطاروق الضلوع النحايف
تجوع سلمى وآترك الكم والكيـف
وآقسم ..رغيفي بيننا بالنصايـف
اقرا وتكـتبني قضيه..وتعريف
وتظمى وتـشربني نحيب وذرايف
صمت الشعـور احساس ماله تواصيف
اكبر من حروف الحكي والوصايـف
ياسيف كيف اشرح لك الوضع ياسيـف
اقلامنا جفت...ورفعت صحايف
كيف ابـتدي يامسندي وانتهي كيف
من دون كيف؟ انامثل منت شايف
شفني بقايا انسان والوقت كالسيف
وحظي كفيف وفرحتي حلم زايف
همي بحر وضلوع صدري...مجاديف
والعمر مركب بين الأمواج طايف
وقلبي وطن وعروق قلبي...تجاويف
للحزن وهمومي شعوب وطوايف
صوعات بقعا والقدر والصواديف
ورتني اهوال السنين...العجايف
اتبع خريف العمر في رحلة الصيف
وازحف على حد السيوف الرهايف
الليل مفتاح السهر والتكاليف
والصبح مفتاح القهر والحسايف
والصبر مفتاح الضلوع ...المناحيف
والحزن مفتاح الجروح الرعايف
والمصلحه مفتاح باب المواقيف
والواسطه مفتاح باب الوظايف
والفقر يفتح ..للوجيه المصاليف
باب الصلافه والضعايف ضعايف
لصارلك حاجه ولالك ...معاريف
بشت القناعه.................................
ان قلت لك خايف ترى ماني ضعيف
ولاني شجاع ان قلت مانيب خاااايف
ياسيف وش عذر المعازيب للضيف؟
لامنها ضاقت .... صدور المضايف
تسفي وحنا فوق روس المشاريف
في راس نايف والخلايف...خلايف
وقل للضعوف اللي تحسب المصاريف
حنا ترانا ..... ماحسبنا الكلايف
لو شحت ايدين الزمان المناكيف
نبقى على عهد الوفى مانزايف
وإن طال بال الليل قل للسواليف
بوح السهر من ضيقة الصدر عايف
