ثوبي الشتوي متاهه والحزن مااحد ٍ درابه=كيف ابسلى من همومي واكشخ بلبس البياض
كيف ابهناا في منامي واهجر دروب الكآآبه=والعرب واروه قبره في ثرى اقصى الرياض
ياوجودي وجد عود ٍ صاح ضيمه والتواا به=لاشكى لأصغر عياله صاح منّه واستغاض
في الخوالي كان قدره عالي ٍ والكل هابه=والزمن بدّل شواهق قدره العالي انخفاض
لا تلفّت في الليالي وانتعت من حر مابه=اتحدّر به همومه في طويلات ٍ عراض
قدّر العالي رحيله وانكتب داخل كتابه=ياوجودي ويش اسوي ما على الوالي اعتراض
ياعرب والموت قاسي لو تشوف العين نابه=لانهش بين الضلوع وبارق الانياب ناض
العرب دُلّه وكل ِ ماسك ٍ درب ٍ مشابه=لادروا بللي بجوفي ؟ والشجن بالقلب هاض
يضحك اللي شاف همّي لا ابتعد واقفى حكابه=كن غراب البين ضيفه في الصدرعشّش وباض
ياعرب واللي درى بي من رفاق ومن قرابه=صدّوا وقفّوا وقفّوا ياعرب قالو تُعاض
يا عساه الموت جاري واكتسي منه ثيابه=لا نسيت بيوم ذكره بأورده موتي حياض
وين قبره ليت يشرى بأشري القبر وترابه=واسقى الانصاب دمعي لا نسكب دمعي فياض
الحزن أمسى رفيقي نوّخ بصدري ركابه=والشعر جيته وحيد وبأتركه خالي الوفاض
خل ثوبي فوق متني واغلق من اللوم بابه=لا تَهَدّم مابنيته ويش اسوّي بالنقاض
ثوبي الشتوي متاهه والحزن مااحد ٍ درابه=كيف ابسلى من همومي واكشخ بلبس البياض