كيف (انقش المى) بالهوى علمتني =وكيف (اجرح الظلمى) معاها تعلمت
وكيف السحابة تنثني فوق متني =وكيف أحترق واندم على ما تندمت
أحيت بي الفرح اليتيم وحيتني=وانهت بي الجرح القديم وتبسّمت
من ساس إحساسي لـ راسه بنتني=تقسم لها جروحي بـ ربي وانا اقسمت
وفي ليلة الفرقا حصل يوم جتني=فوق اليدين اللي بنتني تحطّمت
ماني مصدق كيف روحي جفتني=ماني مصدق كيف منّي تيتمت
لو اليدين اللي خذتني عطتني=ما كان يا جرح الهوى فيّ وسّمت
ولو الحروف اللي حكتها حكتني=ما كنت اجازف واجرح الصمت بـ السمت
في موقفٍ فيه انتهت من بدتني=آموت واحيا به وانا ما تكلمت
حتى فـ امان الله ما طاوعتني=ما غير بالدمعة لها الحال ترجمت
دمعة ألم خجلى عليها بكتني=طاحت على كفّي ومنها تألمت
اقفيت وعيوني لها خالفتني=ورفعت كفّي من بعيدٍ وسلّمت
واللي جرح روحي وناره كوتني=إنّي مع نفسي حكيت وتلعثمت
المعذرة لو قلت يا فاتنتني=مابه حكي يوصفني ابلغ من الصمت