مبارك بدا في نظم زينات الامثال=امثال من راسه وفكره عدلها
طرايفٍ تجلى صدى القلب والبال=تبعد عن النفس الحزينه زعلها
ناح الحمام وجاب له صوت موال=طربان ما يشكي بلاوي عللها
واللي حمامه جعل واديك ما سال=ذكرتي المفجوع زمة جهلها
وقت الرخا يوم السعاده والامال=وعصورنا اللي ما ندور بدلها
يوم القدم يمشي على الارض ما مال=والروح ما يطري عليها زملها
وقت الشباب وحب زينات الاقذال=نجل العيون اللي كثيرٍ خجلها
بيضٍ عفافٍ ما مشن درب الارذال=جواهرٍٍ تسكن بداخل فللها
اليا شافهن راع الهوى جاه غربال=يرمن بسهوم المنايا وأجلها
في حبهن ما نستمع كل عذال=حب الشرف ما محبة دجلها
ايام ما فيها من الهم ولوال=يا حلو صفتنا ويا حلو اهلها
اهل الكرم والجود ذربين الافعال=عز الرفيق اليا شكى من ميلها
فيهم ثلاث اخصال والحق ينقال=دين وشجاعه والكرم في سبلها
اللي مجالسهم بها بن وادلال=وسوالفٍ موزونةٍ عن زللهـا
وساع الصدور مطوعة كل عيال=مثل الجبال الراسيات بسهلها
اليا جاك واحدهم بليهي وشيال=وحمول غيره فوق متنه حملها
يقدرون الرجل ما هو على المال=اليا صار طيب لو لبوسه سملها
واليوم وقتٍ فيه ما زالو رجال=وقت التقدم والتطور شملها
وتطوره سببله الوان واشكال=الله يسترها ويحسن عملها
والروس روس ولا تساوى بالاذيال=عند الرجال اللي تحلل شكلها