وآهمها .. محبوبته .. وآهمها ..
 

في دنيته ..
لاهي
ولاهوب يمّها.

مبلوش بهموم السنين ..
ومختنق في غمّها.

والليل من حوله سراديب وحكايا عابسه ..
والناس فوق اليابسه ..
متواصلين بلا وصول ..
وغارقين بظلمها .

واهمها محبوبته ..
لو درت عن قصته واهمها .

شاعر ولا عُمره لقى ..
مسكون غُربه وأصدقا
وقته سِفين من شِقا ..
ومِشاعِره مَلاّح .

الأخيرة

شيخة الحور وقمرهن
بيضهن واحلى سمرهن
واجمل اجمل من عرفت من العذارى
واكمل اكمل من مشت بين العذارى
والمحال الممكن والصعب والسهل
البعيد اللي وصل
وشهقة الشعر وزفيره
الاخيره

لا تحزني ..
مثلي كثير العايشين بروحهم
وأجسادهم ..
في ذمة الله والنحول مهدهده ..
تقرا تراتيل الكفن ! .

الله ، لو شفتي مداين خاطري ..
وأنوارها ، وأخبارها ،
وذاك السكن ..!

الله لو شفتي الوطن ..
إللي تخيرته أخير.. بعد ما عز الوطن !
ما كان صابتني العيون ..
ولا كان صابك ذا الحزن.

صمتك.. أنا أدري وش وراه ! .
مليون آه ..محاصره في آهتين .
آه .. لعيون الحبيب -
وآه .. من سطوة هواه .

يالفرج ..
صاحبي ما شفت زوله ..
من فقدته فيوم شِدَّه ..
بس لو جاني على قلعة عيوني ..
حالف إني ما أردَّه ..
والمودَّه يالفرج .. هيِّ المودَّه ..
صاحبي .. مالي بصدَّه ..
صاحبي .. روحي عرينه ..
ولو نصاني والنواصي عشب قبري ..
والله إني غصب لآحيا .. ثم أعينه !!

ياهلابه ..

وبعيوبه ..

ياهلابه ..

وبذنوبه ..

ياهلا ..

إن وصلني ياهلا ..

وإن قطعني ياهلا ..

الشيب..
من جيت أنزعه..
قالوا مردّك للبياض..
وكل شعره بـــ أربعة..!!