قبيلة بني رشيد - الصورة للشاعر/ محمد عياد البغيلي

هذي القصيدة من جديدي وأتمنى أن تنال ع إعجابكم
أقول فيها :

سريت من دار أخو مريم لأخو نوره
الديرة اللي عشيري ساكن ٍ فيها
سريت ودار الصباح موادع قصوره
دخلت حد السعودية وأراضيها
دار ٍ لأبو متعب وبالدين معموره
(أطهر ثرى) يالله إنك دوم تحميها
واللي مزوٌد غلاها عشق سنيوره
الجادل اللي حقوق الوصل توفيها
ثابت غلاها وشيد داخلي سوره
صغت القصايد لأجل عينه وأغنيها
آبدع قصيدي ماهو للشعر وجمهوره
كله لأجل عينها ياليت مرضيها
لكن حال الزمن من بيننا بجوره
جتني والأوجان حفٌتها عباريها
جتني نهار الوداع البنت مذعوره
جتني ومعها مكاتيب ٍ لمغليها
ومدت مكاتيبها بدموع محكوره
ثم هلت الدمعه وبانت خوافيها
قالت أنا يامحمد غصب مجبوره
أوادعك والعلاقة غصب ننهيها
قالت ترا في مكاتيبي إلي صوره
يمكن تذكرك عشرتنا وماضيها
من صدمتي شفاهي حتى ماهي مقدوره
تنطق لو بكلمه لتوديع غاليها
وراحت وروحي من التوديع مقهوره
وأنا ادري إن الزمن للبعد حاديها
عز الله في عشرتي مابان لي قصوره
إتصون ماتخون والعشره تداريها
ذكراها دايم يمر القلب ويزوره
واهل دمعي لها لمر طاريها
والشاهد اللي خلٌق هالكون وبحوره
إن (ساعة موادعه ) ماكنت باغيها
ومن بعدها .. بس أقوم أقلٌب الصوره
وأهل دمعي على الصوره وراعيها

أخوكم / محمد عياد البغيلي
ودمتم بــود ,,,