قبيلة بني رشيد - وحذراك من خوة سفيهٍ ومغرور يصير لك في كل الاحوال عاقه

لاصرت في صحتك والحال مستور
يغنيك عن بعض الرفاقه رفاقه
منتب على طرد المقفين مجبور
اما الوصل ولا بلاش العلاقه
وحذراك من خوة سفيهٍ ومغرور
يصير لك في كل الاحوال عاقه
عانيت في الدنيا وشفت الرحى ادور
ولقيتها تطحن ابحد الحماقه
إللي كتبت ابها قوافي ومنثور
وعينتها تغدر ومرات باقه
باقات وردٍ وكثر الوقت بحدور
وترخي عليك المخطيه في رواقه
لوكنت في وقتك شقيٍ ومقهور
مالك سوى ربٍ يفكك اعتاقه
ربٍ يبدل عسر الايام بسرور
مدات جوده وافقت كل فاقه
وياما شكيت الوقت والقلب مخطور
في داخله همٍ عميقٍ ادقاقه
وياما مشيت الدرب والقلب مبهور
يشعق كما نجمٍ سطع في براقه
له عامٍ اقفا والهنا عِد مهجور
مثل السراب اللي يغرك زراقه
يالله عساني تالي الوقت منصور
وشفي غليلٍ داخل القلب ضاقه
واللي صدق فعله رقا العز طابور
ماينتهي لوكان يفتق افتاقه
هذاك شفي لاغدى الوقت مثبور
يظهر غلاه وزاد فعله طلاقه
ولجل الوفا انا الوفا جابر اكسور
اللي مع الصدقان صان الصداقه
اللي لهم فعلٍ لمسناه بشعور
يوم الردي يفتل بخبث ولباقه
ذولاك ناسٍ تِطرب الراس بسطور
لو ابعدو نشفق عليهم اشفاقه
ومايذبحك الارفيقٍ نوى الجور
هذاك والله مالنا فيه طاقه
قافٍ بدعته يفهمه كل منعور
قافٍ سما للنصح والعز شاقه
وهذا كلامي بآخر الليل ماثور
وصاة عودٍ قبل ساعة افراقه