اليكم جديدي عسى أن يحوز على رضاكم ... النص بدون مقدمات :

رقيت رجم الغلا والشعر وحروفـه=سجيت به ساعة الضيقه على معنـا
سلام ياللي عليـه النفـس ملهوفـه=والخاطـر اللـي يفرقنـا يجمعنـا
بيني وبينه يحول الوقت وظروفـه=والساعه اللي على شوفتـك تنفعنـا
ذعذع عليه الهوى وأبعد عن الشوفه=وأرخى عليه الهجر وأصبح مقاطعنا
يليتني مامدحت لغيـري اوصوفـه=يليتنـي ساكـت ولاقلـت مطمعنـا
واللي فرقنا تراها نـاس معروفـه=عذالنـا والغـلا ماعـاد يسمعـنـا
من بعدها فارقـت يدينـي اكفوفـه=ماعـاد فيهـا كـلام ولا تراجعنـا
حظي كذا والحظوظ اليوم مكسوفـه=حظي كذا والكرامـه عنـه تمنعنـا
من أول أوصفًّك واقـول غريوفـه=والظاهر أنا علـى شوفـك تولعنـا
واليوم ياهاجري لعبتـك مكشوفـه=لعبه وزودٍ علـى الغـرات تقنعنـا
والمعذره عجزت أفكاري عن طيوفه=حاولت أقـرًّب منـه لكـن تدفعنـا
أمـور وأمـور والخيـال بسيوفـه=لاقلت هانت سمعنا صوت مدفعنـا
مافيه داعي نمـر البيـت ونحوفـه=مادام نفسي عـن الـذلات ترفعنـا
حتى الرسايل من الجوال محذوفـه=حذفتهـا مانبـي ذكـراك تتبعـنـا
ودعت رجم الغلا والشعر وحروفه=والهاجـس اللـي يعذبنـا يودعنـا

شعر : جميل مساعد الرشيدي