قبيلة بني رشيد - كل طيب يعاني

البارحة ما ادري وش اللي خذاني

يوم اجنبوا عني من الضيقة اشملت
.
جيت أتكلم بس عيا لساني
ماكني إلا مرتكب ذنب واخملت
.
الله يسامح من ذكرت ونساني
وأنا أدري إني لاذكرته تجملت
.
عانيت وأدري كل طيب يعاني
وعلى حساب طعوني الخضر جاملت
.
ياما خذوا مني ولا احد عطاني
من طيبتي في حق نفسي تساهلت
.
عزاي لامنه تجهم زماني
يممت وجهي للكريم وتوسلت
.
واللي يبي قربي وبعدي لقاني
أمشي على وضح النقاء ما تختلت
.
يامن سكنت اجمل زوايا كياني
ياما على نفسي عشانك تحاملت
.
مرات احس انك معي شخص ثاني
ومرات احس انك حبيبي وما زلت
.
لاتفرح انك دجت بين المحاني
لو ماتخون الذاكره ما تسللت
.
عشان ماضيك الجميل وعشاني
حاول تشيل من الوفا ربع ماشلت
.
ماني على خبرك حبيبي تراني
حتى عن اصغار الاماني تنازلت

0
.
0

اسم القصيده وقائلها :
" كل طيب يعاني "
للشاعر // متعب التركي