قبيلة بني رشيد - سلامي على الكفه ومن ياسـم الكفـه

قصيدة بصوت الشاعر قبل سنه تقريبا سجلتها فى جهازى وطلب منى ما انشرها لانه توه قايلها وبعد فتره بحثت عنها بالنت وما لقيتها وهاليومين وجدتها وانقلها لكم ان شاء الله تعجبكم

سلامي على الكفه ومن ياسـم الكفـه
بردة يلطف جوهـا المسـك والكـادي

يا وسم الشرف والطيب والعدل والعفـه
على الرحب والتقدير يا وسم الآجـدادي

وسيمة قبايـل عبـس كفـه بلا خفـه
على صفحة التاريخ هجـري وميـلادي

ليا حلكـة الدنيـا والافــلاك ملتـفـه
طلع نور كفة عبـس مثـل القمر بـادي

قبيله تليـدة مجـد واشعارهـا الكفـه
لهـا فـي سنـام المجد قـاده وروادي

جمعها رشيد وكل عبسي وقـف صفـه
وساد أسمه السامي على روس الاشهادي

شجاع مخضرم حط روحه علـى كفـه
وخلد لـنـا بالمجد مصـدر ومـيـرادي

على البحر الاحمر حط مينا على ضفـه
وله بالخليـج اتبـاع وأنصار وأحفـادي

وحمى الراس الابيض يوم الآجال منغفه
وضلع العلم وابان مع فرعـة الـوادي

على ذكر ماضينا اًنعزل أبيـض الدفـه
تمزق اسبوت الجيش من غزوة جلادي

جـلادان مـن عاداتنـا رفعـة الرفـه
ولا نخلف الميعـاد فـي كـل ميعـادي

على صدق الانوى يوم الامزان مردفـه
لنا في سلم المجـد فرسـان وأسيـادي

ليا ثارت الهيجـاء والألبـاب مرجفـه
وردنـا بفعـل أيمانـا كـل مـيـرادي

سناف اللحم فعـل الجـلادان يوصفـه
ومدحي لربعي ما نقص مجد الاجـوادي

شيوخ القبايل كل شيـخ(ن) لحـق شفـه
هل العرف والعرفان صنـاع الأمجـادي

وأنا من صفا التاريخ كتبي علـى الشفـه
وعندي على ما قول برهـان وسنـادي

ومثل جاهل التاريخ الاطرش مع الزفـه
عيونـه تشوف ولا تسمـع نقـد نقـادي

يا راع الوفاء كيل الوفـاء بالوفاء وفـه
ومن يبخس الميزان لاهل الوفاء غادي

ولو يكذب الكـذاب لـه رمـل ويسفـه
يسمونها هل العلـم حـلاف موسـادي

ومن يعرف الصراط يمشي على الحفه
ولا ينكر المعـروف والملـح والــزادي

ورجل(ن) يازن البندق عن النقص والطفـه
يصيب الهـدف ويصير للصيـد صيـادي

يا برق الحياء عقب المحل رفلـك رفـه
عسى الله يسوق الغيث والخير لبـلادي

اشوف النخل مضمـي والأبيار منجفـه
مضى له سنين عجاف وما دن رعادي

عسـى الله يامـنـا والاشرار بالهـفـه
ياقـي وطنـا مـن حسد كـل حسـادي

واثنـي تحياتـي لوسـامـة الكـفـه
عسى ايامهم بسرور وأفراح وعيـادي

الشاعر
رشيد بن معدى الجلادى الرشيدى

ودمتم بالف خير