قبيلة بني رشيد - منوعات من اختياري رااح تعجبكم اكيد

كان قصدك دمعتي
شفتها من عقب ما غابت سنين *** جت تقل متردده ثم ارجعت.
وقمت اناديها: ابيك بكلمتين *** واستخارت واستدارت وسمعت.
قلت قولي علميني وش تبين؟ *** قالت: اصبر, قلت: يكفي، واجزعت.
قالت: ات تبيّن انك مستهين *** وانت روحك من عنا البعد طلعت.
زين ابسأل: دام قلبك مايلين *** ليه عينك يوم قفيت دمعت؟!
قلت: انا باسي قوي لو ترجعين *** صدقيني عمر نفسي ما خضعت.
وكان قصدك دمعتي لا تفرحين *** شعرةٍ دشّت بعيني وطلعت.
.................................................. .....................
لا تقول حليل
انت ياللي ممتحني وش بلاك ** هي دفاشه غلطتك والا جهل؟!!
كل يوم ارجع وابيّن لك خطاك ** وان خذيت شوي ماتصبر . . . تزل.
قلت لك: يا ابن الحلال الله يهداك ** لا تقول حليل .. لكنك عجل.
عندنا يالبدو ماآظن يخفاك ** لو تقول حليل للجاهل زعل.
بدو .. حنا بدو مانمزح معاك ** انتبه قبل اتّوسّدها عدل.
انتبه للعلم يوم العلم جاك ** قبل يحصل شيء ماابغاه يحصل.
وكان قصدك مدح خل ماك بسماك ** انت مدحك يرفع الضغط ويعل.
لا تقول "حليل" قل الله حلاك ** الحليل بسلمنا يعني خبل.
.................................................. .......................
حب إرهابي
يقطع الحب واسم الحب ودروبه *** اشهد انه لعب يا ناس باعصابي.
ودي اتوب لكن ما اقدر التوبه *** كل ما اسد بابٍ ينفتح بابي.
كن رجلي على ممشاي مغصوبه *** صرت متدودهٍ مدري شسوابي.
ولا وعدني حبيب ورحت انا صوبه *** استخفيت كني واحد ارهابي.
ومن اعجلتي ماالبس ثياب مقلوبه *** لا .. اعدل غترتي قبل البس ثيابي.
.................................................. ...........................
هذا بلا ابوك
يا ناس خلوني معه واتركوني *** محدٍ يعوضني غيابه ليا غاب.
اغليه بس اشلون؟ لا تنشدوني *** الحب من ربي يجي ماله اسباب.
شوفوه بعيوني قبل تعذلوني *** شوفوا حبيبي ما هو بمثل الاحباب.
ترضون والا كيفكم تزعلوني *** انا حبيبي سيد تلعات الارقاب.
ما فيه مثله فـالبشر صدقوني *** مزيون .. متواضع وطيب وجذاب.
واذا مدحته قال: لا تمدحوني *** ماني من اللي يستحقون الاعجاب.
يقول: بس الزين فيني عيوني *** واقول انا: هذا بلا ابوك يا عقاب.
.................................................. ............................
جيت اشتكي
جيت اشتكي لك من عنا الوقت ابرتاح ** لقيت نفسي اشتكي من همومك.
ياعونة الله ما بقى شي ما راح ** مدري ألوم الوقت والا ألومك.
جيتك وقلت بعالي الصوت: يا صاح ** بالله ساعدني ترى اليوم يومك.
لا النفس مرتاحه ولا القلب مرتاح ** وحسيت نفسي واحد من خصومك.
اثريك صاحب بس في وقت الافراح ** وبكل سهوله ترخص اللي يسومك.
الله يعين القلب وشلون يرتاح ** زودٍ على همومه تحمل همومك.
.................................................. ............................
ولو زعل؟!
جا يطيب خاطري في كلمتين ** يحسب ان رضاي مضمون وسهل.
عذره اللي رجعه شوق وحنين ** يحسب ان رضاي بشوية غزل.
مادرى اني حالف وحالف يمين ** ما أرد بكلمتي مهما عمل.
ما يلين القلب والله ما يلين ** وان زعل يزعل .. ويعني لو زعل؟!!
.................................................. ............................
يجي منك اكثر
ما جا على بالي خطاك انت بالذات ** لا تعتذر كافي يجي منك اكثر.
مات الغرام اللي لك بداخلي مات ** ما عاد ينفعك العذر لو تعذر.
مقدر خلاص اتحمل اليوم غلطات ** ما اكذب عليك انا بديت اتغير.
بسكات انا جيتك وابا روح بسكات ** آببتعد واقول هذا مقدر.
قصرت وسواتك معي ما هي سواة ** هذا مع اني فيك ما كنت اقصر.
طوّفت لك مرّه ومرّه ومرّات ** صبرت بس الحين ما ظني اصبر.
واليوم انا نادم على كل ما فات ** لا تعتذر ما دام عذرك تأخر.
هذا جزاي اطي ولا اقول لك هات ** انا اللي استاهل .. يجي منك اكثر.
.................................................. ............................
انشاء الله تعجبكم وعذرونا على القصور
تحياتي : خالد العرعري