قبيلة بني رشيد - ما يقدر ابليس يلعب في عقل : عذرى

إطلالة الصبح : وجه الفارع / الشقرى
بالذات لا فـرّعـت وأرخـت ذوايبـهـا
قطعة من الشمس .. جات بليلة ٍ غدرى
كن المسا من صباح الغـد جايبهـا !
الصبح ما ينتهي معهـا .. وبالاحـرى
تلـقاه من وين ما حطـت .. ركايبهـا
عن الظلام وسواده .. تسمع و تـقـرى
وما كانت تصدقه لـولا .. صحايبـهـا
لاسولـفوا بالسهر والليـل و المسـرى
تشوم عـن .. سالـفتـهـم .. و تعايبهـا
بنت السحاب النـقي من حقهـا تـدرى
على .. نـقاها / براءتهـا / سحايبهـا
وريثة الـمجد يوم الـمجـد مـا يشـرى
لا هب طاري الـفخـر هبـت هبايبهـا
تـفـز وتشوش كـنـها .. مهـرة ٍ صفـرى
اليا انتخوا في .. سميتّهـا .. قرايبهـا
مرت على قلوبنـا وقلوبنـا خضـرى
ورزت عليـها بعـد قفـت ..نصايبهـا
تستاهل الشعر والاعجـاب والذكـرى
ما خيبـت نظرتـي ولا رجـاي بهـا
تـقول للي يبي يلعـب بهـا .. و ازرى
ماقالته من رهى لا اكثـر .. حبايبهـا
ياضعيّف النفس حاول مـرة ً اخـرى
وقم علّم النـاس حاضرهـا وغايبهـا
ما يقدر ابليس يلعب في عقل : عذرى
تقدّر إخوانها .. و تحـب شايبهـا !!
محمد جارالله السهلي