قبيلة بني رشيد - ماشفت مع دوره الايام يومن رحوم

الليل سيد المواجع والهموم النجوم
وقلبي خذا من دروس الضيق منهج له

ما شفت مع دورة الايام يومن رحوم
يوم انها تاتي لـ غيري تبرج له

كن البعد قاع رمضا والمواجع سموم
وكن الخفوق السما والضيق يعرج له

الله بلاني بـ خل(ن) ما يعرف السلوم
لا شاف درب الوصل قام وكسر رجله

ولاشاف درب الهجر والمشكلة والهموم
كنه مبشر..ورجله للبعد عجله

مكانه القلب مثل الطيب عند القروم
وما عوج ضلوعي الا عينه الخجلة

كن الحسن فيه يلبس مثل لبس الهـدوم
والزين مصبوب من راسه الى حجله

اغليه والليل يشهد والقمـر والكمـوم
اللي ملتهـا دمـوعٍ حوّلـت لاجلـه

دخل خفوقي وجاب الخير لي والغيـوم
وامطار حبي لفت والبرق يوهـج لـه

لكن ّحال البشر لو طال ما هو يـدوم
واثره لقى فالملـل عـذرٍ ومخـرج لـه

الليل ما ملّ من قمرى ولا مـن نجـوم
وما شفت نهر الفرات.. يمل مـن دجلـه

ناصر بن ربيع المري