قبيلة بني رشيد - ( الفراق ) لفهد المساعد !!

(من بغى الفرقا لقى له عذر و اسباب و دليل
خل عنك العذر والأسباب دام الحب ضاع

كان ودك بالفراق أبشر عسى عمرك طويل
لا تردد و أنت لك كلمه و لك أمر مطاع)

(لي عليك أن تبت بكلمه تشفي الغليل
ولك علي إني لأوقف وقفه الرجل الشجاع

لاتجاملني مخافه قال مدري خوف قيـل
عمر هرج الناس مايسمن ولايغني جياع)

(كان قصدك سر حبك أوعدك لأصبح بخيل
وأحمل أسرارك معي للموت قدر المستطاع

بس قلها قل ما أحبك و أبشر بصبر جميل
لاتحسب أني مثل من طبعهم لوي الذراع)

(صاحبك ماهو كذا ياصاحب القد النحيل
صاحبك طبعه غريب وغربته غربه طباع

فالهوى مايقبل الحل الوسط ولا القليل
مثل ماهو لاشرا يشري اليا من باع باع)

(ثابت لو هي تميل الأرض حدره ما يميل
يدري إن الفقر ماهو عيب والدنيا متاع

ماعشق لذه حياته كثر عشق المستحيل
ولا كره حتى مماته كثر كره الانصياع)

(كم تعلمت من شديد البدو وش معنى الرحيل
وكم تعلمت من غروب الشمس وش معنى الوداع

وكم تعلمت من سحاب الصيف وش معنى الحصيل
وكم تعلمت من ليال البرد وش معنى الضياع)

(إيه أنا هذا طريقي موحش وصعب و طويل
وأنت لامنك تعبت العالم فجوجه وساع

أعتبرني في بدايه سكتك عابر سبيل
ورح و أنا قلبي معك من وين وجهت الشراع

يكفي أني لاذكرت بسالفه عشاق قيل
عاشر أحبابه شجاع وفارق أحبابه شجاع)

للشاعر الكبير
فهد المساعد