قبيلة بني رشيد - انتبه لاتجيب العيد

يامن أغراه الزمن عوّد ورى وأقرا تليدك
والله ان مهما فعلت ؟ الماضيه ماعنك وعنها
مستعد أنبش ملفك مستعد اصهر حديدك
مستعد أقول للعالم علومك .. وآعلنها
لكن اني شاعرٍ ماضايقه هازل قصيدك
واعرف اصناف الرجال اعرف شجاعتها وجبنها
إسمع اسمع اسمع اسمع إني احاكيك وميدك
لاتسوي مثل قومٍ كن ماخلقة إذنها
لاتلاعب بالحبل خوفي يلفلف حول جيدك
ولا تغرّك وردةٍ حمرا .. ترى الشوك بغصنها
والشعر ماهو بسلعه تشتريها من رصيدك
الشعر .. مهره ترى نادر من يجود رسنها
افهم اقوالي قبل تاتي بعيدك قبل عيدك
العجينه خلها للي عرف كيف ايعجنها
والنصايح خذها من راسٍ حكيمٍ مايحيدك
عن دروب أهل الطلاقه والمشوره ماخزنها
شايبي قد قال لي افهم علي وانا عضيدك
بنصحك يابوك في حاجات لازم تفتطنها
الشعر؟ لو ماتشيده؟.. لاتحسبنه بيشيدك
والله الله فالجزاله لا تجنب عن وطنها
والكلام الهزل خله لا يجي سيده بسيدك
واسكن العليا وخل الواطيه للي سكنها
ومثل ماأورثت المفاخر؟ ورّث الفخر لحفيدك
فالعلوم الطيبه تبقى بالأجيال وذهنها
ولاتغرك مغريات الوقت وتضيع شريدك
مال..منصب..شهره..ودنيا تبين لك زيّنها
الدراهم .. والمناصب..والاسامي..ماتفيدك
قول لي لامت بكره حد ذكرك بشي منها؟
ماحد بيذكرك غير بطيبتك وبفعل ايدك
كم رجالٍ ذكرها باقي ولو هي في كفنها
وان بغيت اقرب مثل واقرب مثل تبغي ازيدك؟
ذيب ابن هدلان مدفون وعلومها مادفنها
وبنصحك يابوك من كبره تطفي في وقيدك
فالمكابر طافي ضوّ.. ولحيته كلن لعنها
وبنصحك في خوة اللي وقت ضيقاتك سنيدك
درع جنب..وسيف يمنى..ضد دنيا ومحنها
وجنب الفسل الردي . وان عاد لك؟ صنّه بحيدك
خوته مثل الفطيره فتره ويظهر عفنها
التجارب مع نصايح بوي ؟ خلتني افيدك
اني واثق واعرف الدنيا دقايقها وسمنهاا
وتدري انك لو تجمع من قديمك لاجديدك
ماتوصل من بيوتي .. ربعها ولاّ ثمنها
السمينه صيدتي ماهي سواة اعجاف صيدك
والجزيله كلمتي تامر على اهزالك وتنها
ومثل ماأسلفت بكلامي إنتبه لاتجيب عيدك
والعجينه خلها للي عرف كيف ايعجنها
واعرف انك من قبيله ذكرها ذكرٍ يزيدك
مثل ماأعرف نار..وأميز شررها من دخنها

سعيد بن مانع