قبيلة بني رشيد - المرتكز + الجدي

بسم الله الرحمن الرحيم

السلام عليكم ورحمة الله وبركاته

هذه المحاورة بين الشاعر المرتكز والشاعر الجدي

المرتكز

سلام تسليمةًتمشي بحسب النظام=والبرد من خلفها والنار من دونها
أهل القصور الجديده جعلها للهدام=لو اكثر الناس يالصاحب يحيونها

الجدي

يامرحبا يامسلم عد وبـل الغمـام=عطنا الجزيله وانا ما والله اخونها
اهل القصور الجديده تظهر الابتسام=لكن اشوف البلاء مدفون بعيونها

المرتكز

دام البقا وعرف ان النور يجلا الظلام=واجزل سواليفنا بالاذن توحونها
بعض العرب ماتلوم ولا عليها ملام=تتبع مقاريد خلق الله ويعمونها

الجدي

النور نور القمر بدر الدجى والتمام=ياجمرةٍ تو ماحطت بغليونها
انا مالوم العرب ياجعلهـا للعـدام=لو كان هي بينت لي ضحكت سنونها

المرتكز

الكلمه الطيبه اردها بحترام=خلك بشونك وخل الناس في شونها
ياالجدي محدن بسالم من عيال الحرام=نكباتها بقرب العربان يرضونها

الجدي

الكلمه الطيبه تشرى قبل لاتسام=والديره الممحله مانقرب اركونها
ياصاحبي لاتطالع فالردي الخمام=من دوروا للرديه غصب يلقونها

المرتكز

بعيرنا الي من الايام جاه الهيام=يصبر على الكلمه اللي نادرن لونها
ان كنت تجهل علومي يارفيع المقام=قلتلك خل القدم تمشي على هونها

الجدي

بعيرنا شال حمله ياولد قبـل عـام=هاك السنه ياعميلي كيف تنسونها
مانيب جاهل وجوك لايجي به عسام=الناس نعرف معقلها ومجنونها

المرتكز

البدو صارت مقيمه عقب نقل الخيام=والحضر سارو على الطرقه يدلونها
ان طعتني روح ريح فوق ريش النعام=وعد العلوم العجاف اللي تعدونها

الجدي

البدو تسرح وترعى تحت ضل السنام=والحضر كالنخله اللي مال عرجونها
الحر لامن جزع مايلتفـت للحمـام=وعلومكم ليش بالله ضاع قانونها