حبيبي طيفك البارح غزا حصني وهد اسوار=تسلل داخل عروقي وتحصن في شراييني
هلابك جابتك ذكرى لفت بك من بعيد الدار=وحظنت بضامري طيفك وقلت بشوق ضميني
سهرت آسامر اطيافك وسولفنا عن الاقدار=وعن حب دفن نفسه وعن ما تخفي سنيني
وتعاهدنا على مبدء احبك لو جنيت امرار =واحفظك سر في صدري وبشواقك تغطيني
عرفت ان الفجر قرب وسد الصمت فيك انهار=وموعد رحلتك قرب صرختي لاتجافيني
وشفت بعيني طيوفك تودعني ودمعك حار =وخيم فوقنا صمت كسرته في تشوفيني
مسكت كفوفك بيدي وكانت شعلة المسفار=في امان الله ودعتك صداها صار يشقيني
حبيبي من يواسيني اذا وقتي عليه جار=اذا كف القدر فرق مابين عيونك وبيني
نذرت الروح من شانك هويتك وابتدى مشوار=وانا ماعيش من دونك ولاغيرك يسليني
تعال اجلس معي خلي ترى عيني عليك تغار=ترى ماعاد اتحمل غيابك يانظر عيني
انا برسمك ياخلي على وجه الزمن تذكار=وابنقش جانب الرسمه احبك لاتخليني
يكون الحبر بالرسمه خليط الدم والازهار=وابرسم داخل عيونك مواني حب ترسيني
وفوق العين ياعيني حجاج من نظره احتار=واظلل محجر عيونك بلون فيه تفنيني
واببدع في رسم ثغر تخالط فيه ثلج ونار =وابصور ملامح ضحكة فيها تراضيني
شفاتك لونها يجرح ومنها تنسكب انهار=اموت بجالها ضامي ولاظنيت ترويني
ابجهد نفسي برسمة سواد يلفت الانظار=ظلام كاسي امتانك بخوفه دوم يضويني
ظلام يرعب الليل وسكونه يهدم الافكار=ليامنه رخى ستاره علي من يقديني
واباخذ من رذاذ الثلج ملامح تكسف الانوار =وابسرق من جبين البدر لمعه وجه تغريني:
ابتجاوز حدود الفن في رسمك بكل اصرار=ابسهر جفني لعينك واتعب لاجلك يديني
ابترك في الزمن بصمة حياتي وانسج الاشعار=واتوج في سما الكلمة حروفك يامعنيني
ابكتب شعر لعيونك واسطر للغرام اسرار=وادون في صدى شعري ترى ذكراك تكفيني
حبيبي جيتك بلوحة هدية تحتوي تذكار=رسم وجهك مع حرفك وكلمة لاتخليني