قبيلة بني رشيد - منظمة عبس( تخليد امجاد الاجداد ومجد الاحفاد)

اخواني واخواتي اضع بين ايديكم هذه المتواضعه بمناسبة اجتماع كافة ابناء قبيلة بني رشيد في العالم العربي تحت مظلة منظمة عبس العالميه( تعارف - تعاون - تكافل )
وتعلمون شعور الانسان حينما تجتمع قبيلته على البر والتقوى
وقد القيت هذه القصيده في حفل الشيخ جزاء بن شميلان القلادي وكان من ضمن الحاضرين الدكتورعبدالله سعد العويمري
واعجب بها واهداني بشته اللي اعتبرها شهادة من رجل له مكانته

البارحه مع دلة الكيف سهار=والنار والدله جميلٍ سمرها
بريةٍ يجمع بها بن وابهار=مع زعفرانٍ والعويدي ذعرها
مسرور ماسهرني هواجيس واكدار=والطيب نوب العين يجلب سهرها
وسرابي الهاجس على نوع تذكار=وحواسي الخمسه توخت حذرها
وتلاطمن اموج شعري والافكار=ثم اطلعنْ من الضماير دررها
واستلهم الخاطر جزيلات الاشعار=جزل القصايد بالمواقف سخرها
واللي دعاني شوف صلبين الاشوار=بني رشيد اللي اطوالن اشبرها
متكاتفين احرار في عال الاوكار=في موقفٍ كل الخلايق بهرها
بمنظمه تعطي عن الماضي اخبار=ويفخر بها هالحين منهو حضرها
فيها تكاتف همة رجال واصرار=على المعالي والدروب نخبرها
مايحدنا عن بعضنا طول الامتار=كل الدروب الكايدات نعبرها
وحدة مواقفنا لنا عز واشعار=في صفحة التاريخ يذكر خبرها
فينا الحميا تشتعل كنها نار=من بيننا رب الخلايق عمرها
بني رشيد اخوان في كل الاقطار=نمشي على نهج الجدود وسيرها
الوسم واحد والفعل يجلا الامرار=ويحط في كبد المعادي قهرها
يوم الرمك والجيش له عج واغبار=كم سابقٍ وقت الطراد نعثرها
واخصامنا تحشر على درب الاخطار=مثل الجنون وقول ربي حشرها
وابطالنا تقبل كما اقبال الاعصار=خيل المنايا وقفوا في نحرها
ونفوسهم وان جات بيعات الاعمار=مافيهم اللي دون ربعه ذخرها
وان مست الحاجه وغلين الاسعار=والفقر سبب للخلايق كدرها
مداتنا تبهج حبيسين الاعسار=تفرح بها نفسٍ زمنها عسرها
حتى المزون الغر من مدنا تغار=الله عطانا جود يغلب مطرها
فينا صفات المرجله دون نختار=كذا ولي العرش فينا فطرها
بني رشيد احرار من ماكراحرار =سود الظروف الكايدات نحقرها
شمس النهار اليا بدت تخف الانوار=وان اظلمت سود الليالي قمرها
وكل القبايل نعم وافين الاشبار=عن المدايح فعلها ماقصرها
وختام ماقال الجريشي من اشعار=صلوا على المختار مانور زهرها

وتقبلو تحياتي
محمد ربيعان الجريشي