قالت محمد قلت لبيه واهلين=ياغاية محمد وكل ارتياحه
قالت اشوف الهم والغم والبين=غلاك كلٍ شاهرٍ له سلاحه
قلت ادري ان اعداي ماهم براضين=كلٍ ركز من دون شوفك رماحه
ومادام من بيني وبينك معادين=حلمٍ وراء الانذال مافيه راحه
قالت وكيف؟ وقلت ياقرة العين=مافيه مثل البينه والصراحه
قالت افراق وقلت لابد يازين=لابد تنزف بالضماير جراحه
قالت وتصبر قلت صبري على الشين=قلبي يذوق الموت ليله صباحه
قالت وتنسى قلت لالا تظنين=قانون لايمكن بقلبي نجاحه
انساك كيف انسى واناحالفٍ دين=وخيانته للحر ماهي مباحه
ما انساك لو ننسى قضية فلسطين=ولو يستوي جد الكلام ومزاحه
اشتاق لك لاشفت خضر البساتين=وان حل ذكر الحب في كل ساحه
واثنا حديثي مع هنوف المزايين=سالت مدامعها بضيق وتراحه
لديت فيها قلت وش فيك تبكين=قالت هذا وقت البكاء والنياحه
وخانتني العبره وسيلت خدين=ودمعي على خدي تقافى طياحه
واول دموعي في عيوني مساجين=والحين وبل الدمع نطلق سراحه
قالت اقول وقلت لالا تقولين=ارجوك قلبي لايزيد انجراحه
وودعتها توديع غالي لغالين=وكلٍ قطع رجواه لحظة مراحه
واقفيت كنه وسط قلبي سكاكين=والقلب قفت فرحته وانشراحه
وضاقت بعيني واسعات الميادين= الارض اشوف الارض مامن مساحه