اخواني واخواتي اعضاء وزوار منتديات شبكة عبس اضع بين ايديكم هاذي القصيدة التي تشرفت بالقاها أمام سعادة أمين عام منظمة عبس العالمية المهندس مبارك ابن فهد الدويلة بالحفل المقام في عين ابن قنور
امل ان تحوز على رضائكم

بغيت أسوي بك قصيدة يا مبارك وأبتديت = وضاعت علوم الشعر والطرقة عجزت أدلها
رغم أني أعرف كيف أعسف الشعر لامني نويت = أهجم عليهم وأستبيح أشعارهم وحتلها
ولا حسبت حساب للشعار لكن ما شنيت = واثق بشعري والبحور المظلمة ضار لها
أدخل بغبتها وخليها وراي ليا أرتويت = والغابة أدخلها وقلد مهرتي من فلها
لكن هالمرة صراحة لا عجزت ولا قويت = بس الوكاد أشياء بنفسي ما قدرت أوصلها
أجيب عشر أبيات لكن ما تساوي نص بيت = تدري لماذا ؟ لأنك أكبر من بيوتي كلها
ياللي على رأس الهرم جيت وتحريت وبقيت = كل القبايل تدري أنك شمس عبس وظلها
وحنا قبل يدرون ندري كيف للعليا رقيت = وأخذتها بكف عسى رب الملا ما يشلها
ما أخذتها بقلط تفضل سيدي شلي بغيت = ولا جتك عن طرق الهنوف اللي تباها بدلها
خذيتها من عبس يوم أنك لها أسست وبنيت = وجتك الزعامة يا زعيم القوم وأنت أهل لها
يا محنك التفكير والتعبير لا منك حكيت = نحس في شيً يهز قلوبنا ويملها
الله وكيلك لو تنادينا نجيلك كمبليت = اللي تعز نعزها واللي تذل نذلها
وأسمح لي أسميك أبو كفين دامني رويت = والكلمة الزينة تزين أن قلتها في حلها
كفً كريمً والكريم الله ليا منك عطيت = تروي عطش شهب الكبود اليابسه وتبلها
والكف الآخر مثل ضلع طويق لا منك قسيت = قلعة شموخ وعز لو جار الزمن ما يهلها
وختامها يا شيخ عبس بنجد ولا بالكويت = أقبل تحية شاعرً سود النوايا يعلها
أقولها بصوتً قوي رضيت ولا ما رضيت = جتك الزعامة يا زعيم القوم وأنت أهلً لها
وضاع أول الطاروق لكن يوم دورته بديت = بس الوكاد أشياء بنفسي ما قدرت أوصلها