أنـا باتمثّـل واجتهـد فـي مثايلـي=ولابـد مايجـري فالأعمـار دودهـا
وأنا مثل وارد علـى المـاء ينـادي=على خير وأهل الخير تجذب ورودها
وأنـا باتمسّـك فـي حبـالٍ وثيقـه=وأجوّد عصى التوحيد وأفرح بزودها
ولاأفرح بكثر المال يخلـف روابعـي=والا رياء تضيع راي عـلا يسودهـا
تزخرف لنا الدنيـا وتمشـي قبالنـا=تلمـس ملامسهاوتظهـر خدودهـا
ياسايـل عنـا تـرى الحـال ثابـت=طوينا الحبال اللي طـوال شدودهـا
مشينا ولاندري متى ناصـل المـدى=مدانا القبور اللـي ظـواقٍ لحودهـا
وأنـا تابـعٍ سنـة محمـد نبيّـنـا=وأعرف المشاكل واجتهد في خمودها
والأجواد مثل الزمل والزمـل مثلهـا=بيـض غواربهـا كبـار لهـودهـا
تحلحل وتبـرك للحمـول وتشيلهـا=صبور ليـا ظاقـت عليهـا بدودهـا
والأجـواد والله ماتمـاري بمالـهـا=وان مسّها اللازم عطت من وجودهـا
والأجـواد لاجاهـا لـزومٍ تجمّلـت=كما السدره اللـي ناعمـاتٍ قنودهـا
وفالأجواد حصن معربـات وأصايـل=تبي الجود مير الفقر يقصر قيودهـا
والأجواد في وقت العطى تعطي العطى=والأنذال عن ذاك سريـع صدودهـا
لاصـار معهـا مــالٍ تشـطّـرت=وان ذاقت الحاجه تحسـب جدودهـا
ياشاري الجرب حاسي علـى الطـلا=ترى الهيم والجربا مرضهـا يعودهـا