قبيلة بني رشيد - سراب اللال

عوده للشعر النسائي بعد غيبه طويله
مع شاعره سعوديه من وادي الدواسر
اسمها " النادره "
حقيقة هي اسم على مسمى بين الشاعرات.

اترككم مع شعرها الجزل بقصيده تحت اسم

" سراب اللال "

هات القلم ياخوي في خاطري بوح

* ودي اترجم لي طواري وهوجاس

واخذ من الابيات سجّه مع الروح

* في معزلً ما فيه ما يزعج الراس

هذي ثمان سنين والقلب مجروح

* والفكر شارد والمعاليق يبّاس

ويفوح في صدري همومن كما فوح

* صفر الدلال اللي لها الناس جلاس

امشي على درب المقادير وانوح

* ويهيض وجداني ليا هبّ نسناس

سبة ظروفٍ تجهد الحال وتروح

* وتترك مواجعها على القلب حراس

تعبت وانا اشيل والوقت مشفوح

* يطوي سنيني دن رحمه ولا احساس

كني غريق شاف موته على لوح!

* تلعب به الامواج ما صابه الياس

ابني من الاحلام بنيان وصروح

* احلام ورديه غدت ما لها ساس!

واطرد سراب اللال واخيلها دوح

* مثل الذي فالدهر للسيل عسّاس

وازيف الفرحه سواليف وامزوح

* وامنّي الخاطر بلا باس لا باس

تدري وش اللي يقهر القلب والروح؟

* انك تعيش العمر محتاج للناس!!

النادرة