شاعر الثقلين

سلام رديه تخص السبع وتعم الحضـور=تبرق وترعد والبرد بيمينهـا ويسارهـا
تعال ياسبع ٍ من أنواع الذيابه والنمـور=ترى العرب وقت اللوازم يقلطون أخيارها

السبع الضاري

يامرحبا ترحيبة ٍ تكفخ بجنحـان الطيـور=ارياحها شعف الهبايب والرعود اغبارهـا
جينا على برق الحيا والخيل تبراها السبور=لو عندنا علم وخبر حظي طلع واختارهـا

شاعر الثقلين

لا حن رعاد الغضب ترى الوعد يوم النشـور=الضلع به بركان وجنونـه تحفـظ أسرارهـا
وش حيلتك بالحجه اللي دونها هـوج البحـور=قامت ( تناخا ) صغارها واللي ( تناعا ) كبارها

السبع الضاري

غيّم سماء ابصار العيون الصاحيه والعور عور=رقط الحيايا تطحن تحت الجبـل فـي غارهـا
الامر نبغـى نسنـده للـي يحلـون الأمـور=اعط العرب فرصة تحزم اشوارهـا باشوارهـا

شاعر الثقلين

لو ثارت البلجيك بالأولى وقطعنـا الجـزور=ماوصلت الاخرى ولاشم الربيـع حوارهـا
يالله تعوض أبنا العرب باللي توارو بالقبور=مادام بقعاء شفت سرج الحصن فوق حمارها

السبع الضاري

ياكثر ماراحت على جنونك على طول العصور=احيان بـرا دارهـا واحيـان داخـل دارهـا
الجملة اللي ضِلْلَت بين الفواصل والسطـور=خطوة بطرفة عين راحت وانتهى مشوارهـا

شاعر الثقلين

ياطير ياللي تكفخ الجنحان من بين الصقور=الأرض زلزل وأختلط زلزالها وأعصارهـا
ترى الذهب لو طالت الأيام عمله ماتبـور=مالي ومال أصدافها ونحاسهـا وأحجارهـا

السبع الضاري

الندوه اللي جمعت علط المـذارع والخصـور=لاثار بركان الغضب (وشلون) تقرأ اخبارهـا
من يقنع الثور النطوح ،أليا ثغى بالحوش ثور=اخذ العبر من ناس فالواجب تبيـع اعمارهـا

شاعر الثقلين

حنا شربنا من وجيه المزن والوبل الطهور=وجمال يعرب بركت فوق الصفاء بازوارها
الثور حول بالوحل وأن ماثغى لازم يخور=والبقره الحمراء تلفت وأعتزى جزارهـا

السبع الضاري

هناك ربك والحياه اكفاح والدنيا عبـور=كل الطيور مهاجره وتعود يـم اوكارهـا
ياصاحبي لاتبتلش لو ماتعذرت معـذور=لا وهنيك بأرض تونس قد قطفت اثمارها