ياهنووه - شوفي تلّ عيني،، وانا اشــوف=وعـيني على تعزيز شوفي مــضرّاه
آخذ نفس ،واعــوذ من وحشة الخـوف=وصدري متى ماعسـعس الضيق ،، سرّاه
محروم من نفسي ، وبالناس مكلوف=وأصـبر واسولف بالفرج واتحـــــرّاه
سرّي خذا مني ، مواثيق وحلوف =وكل ماسترتة صدق الاحساس - عــرّاه
عندي ظروف (مغـلفّة) داخل (ظــروف) =وحــروف من غيري ياغيري مـبرّاه
و(طفلة خيالي) تعـطي الواقع كفــوف=وتشرد ورى (ظهر الحكي) واتطرّاه
تلعب معي فوق الورق لعـبة حروف=وتمسك قلمها دون اصابــع ، وتبراه
تبني لقيضي غيمتينًِ ، ونفـنـوف=وتكتب (سكوتي) فوق (صوتي) وتقراه
وابني لها من (الما) مرايات ورفوف =واطحن لها من (الليل) كحلٍ تدرّاه
مكياجها ، من البرق والثلج مصروف=وفستانها ، من ضو شمسي ( تذرّاه )!
وسلسالها ، يالنور مطلي ومشيوف=اسمي علية - لكل ناقد ، وشرّاه
مخطوف كلي في يديها ومكتوف =واحرّ قلبي من يديها،، واحــــرّاه
تنعس، وكل احلامها توقف صفـوف=وكل ماتحقق حلم ، الآخـر تحـرّاهـ
ماحـدٍ درى عـني ،،وانا اموت ملهوف=وقلبي عن اللي( صار لي ) ويش درّاه ؟؟
(والشعر) ذنبٍ من طحاحيح وضعــوف=و(من يتهم عـدلي ) (من الظلم - بــرّاه )
ومـيزة دروبي فارقـة ،، مثل ماتشوف = ونفسي على درب اختلافي (مــضرّاه )